Раҳим Саидзода, вазири маориф ва илми Ҷумҳурии Тоҷикистон аз фаъолият ва ҳолатҳои гигиении як муассисаи таълимии томактабӣ ва як мактаб дар ноҳияи Фирдавсӣ дидан намуда, зимни санҷиш якчанд камбудиҳоро ошкор намудааст. Дар ин бора АМИТ “Ховар” бо истинод ба маркази матбуоти Вазорати маориф ва илм хабар медиҳад.

Гуфта мешавад, ки зимни боздид аз муассисаи таълимии томактабии №134-и ноҳияи Фирдавсӣ камбудиҳои ҷойдоштаро, аз қабили, риоя нагардидани реҷаи корӣ дар муассиса, тибқи меъёр ва дар вақти муқарраршуда надодани хӯрок ба кӯдакон, инчунин омода набудани муассиса ба фасли зимистон, бавижа захира накардани маводи хӯрокворӣ барои фасли тирамоҳу зимистон, дар ҳолати ғайрисанитарӣ қарор доштани муассиса, набудани майдончаҳои ба талабот ҷавобгӯ барои машғулияти кӯдакон, дуруст истифода нашудани заминҳои назди муассиса, вазири маориф мушоҳида ва ошкор намуданд.

Камбудиҳои дигар аз ҷониби вазири маориф дар муассисаи таҳсилоти миёнаи умумии №42 маълум гардидааст.

Дар ин муассисаи таълимӣ корҳои тарбиявӣ дар сатҳи зарурӣ ба роҳ монда нашуда, дар саҳни муассиса ва роҳравҳои он хонандагон бо якдигар бо алфози қабеҳ суҳбат мекарданд.

Ба талабот ҷавобгӯ набудани майдончаҳои варзишӣ, баргузор нашудани шанбегиҳо, дар саҳни муассиса нигаҳдорӣ шудани қуттиҳои партов ва дар ҳолати ғайрисанитарӣ қарор доштани муассиса, аз ҷумлаи камбудиҳои дигаре буданд, ки дар ин санҷиш вазири маорифи кишвар ошкор намуд.

Дар ибтидои санҷиш ба роҳбарони муассисаҳои таълимии мазкур ва мудири шуъбаи маорифи ноҳияи Фирдавсӣ супориш дода шуд, ки камбудиҳои ҷойдошта саривақт ва дар муддати кӯтоҳ бартараф гардида, аз натиҷа ба вазорат ҳисобот пешниҳод карда шавад.