Фаъолияти пурсамар дар давраи бемории ҳамагири Ковид-19, вазъи имрӯзаи муассисаҳои таълимӣ, навгониҳо ва мушкилот дар низоми таҳсил, баланд бардоштани сатҳу сифати таълим дар муассисаҳои таълимӣ, сохтмону таъмири биноҳои таълимӣ, бунёди муассисаҳои нави таълимӣ, вазъи идомаи таҳсили донишҷӯёни хориҷ дар соли таҳсили оянда, тарбияи кадрҳои баландихтисоси, рушди илмҳои дақиқ, дастгирии моддию маишии хонандагону донишҷӯёни маъюб, бесаробон ва камбизоат.

Ин ва даҳҳо масоили марбут ба соҳаи маориф ва илми кишвар дар нишасти хабарии Вазорати маориф ва илми Ҷумҳурии Тоҷикистон, ки санаи 16 июли соли 2021 баргузор гардид, мавриди таҳлилу баррасӣ қарор гирифт.

Вазири маориф ва илми кишвар Муҳаммадюсуф Имомзода ба рӯзноманигорон иттилоъ дод, ки имрӯз дар ҳудуди ҷумҳурӣ 681 адад муассисаҳои томактабӣ, 3911 адад муассисаҳои таҳсилоти умумӣ, 150 адад муассисаҳои типи нав (75 гимназия ва 75 литсей), 63 мактаб-интернат барои кӯдакони ятиму бепарастор фаъолият мекунанд. Шумораи муассисаҳои томактабӣ нисбат ба ҳамин давраи соли гузашта 19 адад ва муассисаҳои таҳсилоти умумӣ 27 адад зиёд шудааст. Азхудкунии барномаҳои таълимӣ низ беҳтар арзёбӣ гардид.

Ҳамчунин қайд гардид, ки дар 6 моҳи соли ҷорӣ тибқи бурсияҳои байниҳукуматӣ аз ҷониби кишварҳои Русия, Қазоқистон, Украина, Белорусия, Хитой, Туркия, Руминия, Тайланд, Полша, Сербия, Венгрия бурсияҳои таҳсилӣ дар тамоми зинаҳои таҳсилот ҷудо шудаанд. Дар ин давра бурсияҳои Донишкадаи давлатии муносибатҳои байналмилалии Москва ҷамъбаст шуд, ки тибқи тартиби муқарраршуда 5 нафар дар зинаи бакалавр ва 3 нафар дар зинаи магистратура интихоб ва пешниҳод шуданд.

Вазир вобаста ба сохтмону таъмири биноҳои таълимӣ қайд намуд, ки соли 2021 дар қаламрави ҷумҳурӣ аз ҳисоби ҳамаи сарчашмаҳои маблағгузорӣ сохтмони 214 бинои муассисаи таълимӣ ва бинои иловагӣ дар назди муассисаҳои таълимӣ барои 48 ҳазору 481 ҷойи нишаст ба нақша гирифта шудааст. То 1 июли соли ҷорӣ 34 муассисаи таълимӣ барои 7436 ҷойи нишаст ва 7 муассисаи томактабӣ барои 2055 кӯдак сохта ба истифода дода шуд. Ҳамчунин дар доираи ҳамкориҳои дуҷониба бо Ҷумҳурии Ӯзбекистон бо ибтикори Пешвои миллат муҳтарам Эмомалӣ Раҳмон дар ноҳияи Ургути вилояти Самарқанд МТМУ №154 барои 1400 хонанда дар ду баст ба истифода дода шуд.

Зикр гардид, ки Вазорат ҳамчунин барои таъмиру навсозии 8 мактаби таҳсилоти умумии ноҳияҳои Тоҷикободу Рашт, ки бар асари заминларзаи субҳи рӯзи 10 июл пурра ва қисман вайрон шудаанд, муваззаф гардидааст.
Тавре масъулини Вазорати маориф ва илми кишвар иброз доштанд, новобаста ба корҳои басомонрасонида ҳоло ҳам дар соҳа камбудиҳо ба назар мерасад ва масъулини вазорат кӯшиш ба харҷ медиҳанд, то камбудиву мушкилоти ҷойдоштаро тадриҷан ҳал ва ислоҳоти соҳаро дар ҳама самтҳо амалӣ намоянд.