То соли 2022 дар шаҳру ноҳияҳои Вилояти Мухтори Кӯҳистони Бадахшон 54 муассисаи таълимие, ки дар ҳолати фарсудаву садамавӣ қарор доранд, таъмиру азнавсозӣ мегарданд.

Дар ин бора сардори Раёсати маориф ва илми вилоят Одинашо Мардов дар нишастӣ хабарӣ иттилоъ дода гуфт, ки дар асоси дастуру супориши Пешвои миллат муҳтарам Эмомалӣ Раҳмон вобаста ба масъалаи болозикр Комиссияи махсус, аз ҳисоби масъулини Вазорати маориф ва илми кишвар, Дастгоҳи иҷроияи Президенти Ҷумҳурии Тоҷикистон таъсис дода шуда, дар ояндаи наздик корҳои азнавсозии мактабҳои вилоят вусъати тоза пайдо мекунанд.

Ба гуфтаи О. Мардов соли гузашта ба ифтихори 30 – солагии Истиқлолияти давлатии Ҷумҳурии Тоҷикистон дар шаҳру ноҳияҳои вилоят ҳашт муассисаи таълимӣ ва як адад кӯдакистон бо харҷи 26 миллиону 390 сомонӣ ба истифода дода шуда, инчунин то давраи ҷамъбастии ҷашни 30 – солагӣ, ҳафт муассисаи таълимиву як адад кӯдакистони дигар бо арзиши 35 миллион сомонӣ сохта мавриди баҳрабардорӣ қарор мегиранд.

- Яке аз дастовардҳои соҳа дар самти фарогирии кӯдакон ба муассисаҳои томактабӣ аст. Ҷиҳати татбиқи Паёми навбатии Президенти кишвар муҳтарам Эмомалӣ ба Маҷлисӣ олӣ то соли 2021 40 фисади кӯдакон бояд ба муассисаҳои томактабии вилоят фаро гирифта мешуданд. Хушбахтона дар вилоят ин нишондод барзиёд иҷро гашта, феълан 41, 2 фисади кӯдакон ба муассисаҳои томактабӣ фаро гирифта шуданд. Гарчанде ки дар ин самт пешравӣ аст, аммо камбудӣ ҳам ҷой дорад. Яъне агар дар маҷмӯъ то ин давра 29 ҳазору 406 нафар кӯдакон фарогири муассисаҳои томактабӣ шуданд, 20 ҳазор нафари дигар ҳоло ҳам ба муассисаҳои томактабӣ ҷалб нагардиданд, - афсуд О. Мардов.

Қайд гашт, ки мушкилии соҳаи маорифи вилоят дар он аст, ки дар аксарияти шаҳру ноҳияҳои вилоят барномаҳои соҳавӣ аз қабили Барномаи такмили таълими омӯзиши забонҳои англисӣ ва русӣ, Барномаи муҷаҳҳазгардонии кабинетҳои фаннӣ, Барномаи фарогирии кӯдакони синни томактабӣ барои соли 2020 – 2025, Барномаи дарёфти рушди истеъдодҳо, Барномаи ҷиҳозонидани лабораторияҳо ва ғайра аз тарафи мақомотҳои иҷроияи маҳаллии шаҳру ноҳияҳо дастгирӣ намеёбанд.

Норасоии кадрҳои омӯзгорӣ фақат дар ноҳияҳои Дарвозу Ванҷ мушоҳида шуда, дар соли таҳсили 2018 – 2019 толибилмони вилоят дар олимпиадаи ҷумҳуриявӣ 15 медали тилло ва аз як олимпиадаи байналмилалӣ як медали тилло ва як биринҷиро ба даст овардаанд.