Донишгоҳи миллии Тоҷикистон барои густариши робитаҳои байналмилалӣ чораҳои муассир андешида, дар нимсолаи аввали соли 2018 раёсати донишгоҳ бо 19 муассисаи таълимӣ ва марказҳои илмии хориҷи кишвар тариқи бастани созишномаву тафоҳумномаҳо, ҳамкорӣ барқарор намудааст.

Донишгоҳ пас аз мулоқоти таърихии Президенти кишвар бо Президенти Ҷумҳурии Ӯзбекистон дар даҳаи аввали моҳи марти соли 2018 ҳамкорӣ бо муассисаҳои таҳсилоти олӣ ва марказҳои илмии давлати ҳамсоя ба роҳ монда, бо 7 донишгоҳу донишкадаҳо, аз ҷумла Донишгоҳии давлатии омӯзгории Ӯзбекистон, Донишгоҳи давлатии Самарқанд, Донишгоҳи давлатии Фарғона, Донишгоҳи давлатии Андиҷон ва ғайра созишномаҳои ҳамкорӣ ба имзо расонидааст.

Ректори донишгоҳ Муҳаммадюсуф Имомзода рӯзи 17 июл зимни нишасти матбуотӣ чунин иттилоъ дод: “Айни ҳол ДМТ бо 131 муассисаи таҳсилоти олии касбӣ, муассисаҳои илмӣ – таҳқиқотии кишварҳои хориҷӣ ва созмонҳои байналмилалӣ шартнома ва қарордоди ҳамкорӣ дорад. Донишгоҳ аъзои Донишгоҳи шабакавии Иттиҳоди Давлатҳои Мустақил, Донишгоҳи Созмони Ҳамкориҳои Шанхай мебошад. Ҳамчунин узви фаъоли Ассотсиатсияи донишгоҳҳои АвруОсиё, Ассотсиатсияи донишгоҳҳои Осиё, Ассотсиатсияи байналмилалии омӯзгорони забон ва адабиёти рус ва созмону консорсиумҳои дигари байналмилалӣ мебошад”.

Ба гуфтаи Муҳаммадюсуф Имомзода дар доираи ин ҳамкориҳо донишгоҳ мизбони як қатор конфронсу ҳамоишҳои байналмилалӣ гардида, намояндаҳои донишгоҳ дар чорабиниҳои сатҳи байналмилалӣ берун аз кишвар иштирок ва дар мавзӯъҳои гуногуни илмӣ маърӯза намуданд.

Ба иттилои ректор нимсолаи аввали соли 2018 дар таҳкими робитаҳои байналмилалӣ барои донишгоҳ пурбарор маҳсуб ёфта, дар ин давра сафарҳои илмӣ, омӯзишӣ, коромӯзии илмӣ, табодули таҷриба, сафарҳои кории устодону кормандон, донишҷӯёну магистрантон афзудааст:

- Соли сипаригашта 5 нафар намояндаи донишгоҳ тариқи буҷавӣ ба донишгоҳу марказҳои илмии Русия қабул гардиданд. Айни ҳол 19 намояндаи ДМТ аз рӯи ихтисосҳои гуногун дар аспирантураи кишварҳои хориҷӣ таҳсил менамоянд. 9 аспирант ва 2 докторанти донишгоҳ барои коромӯзии илмӣ ва анҷом додани корҳои илмӣ-тадқиқотӣ дар озмоишгоҳҳои илмӣ бо маблағгузории ДМТ ба донишгоҳу марказҳои илмии хориҷи кишвар фиристода шуданд. Ҳамчунин як қатор донишҷӯёни мо дар доираи созишномаҳои байнимуассисавӣ тариқи барномаҳои гуногун ба донишгоҳҳои бонуфузи дунё барои таҳсил фиристода шудаанд, - илова намуд М. Имомзода.