МАОРИФ ВА ИЛМ
Сешанбе 23 Октябр 2018 10:02
4930
Зери ин унвон дар маҷлисгоҳи Кумитаи миллии олимпӣ бахшида ба Рӯзи забони давлатӣ конфронси илмӣ-назариявӣ баргузор гардид.

Конфронс бо ташаббуси Кумитаи кор бо ҷавонон ва варзиш роҳандозӣ гардида, дар он намояндагон аз Вазорати маориф ва илм, Акдемияи илмҳо, Кумитаи забон ва истилоҳот, Кумитаи рушди сайёҳӣ ва олимону муҳаққиқони ҷавон иштирок ва суханронӣ намуданд.

Аҳтам Абдуллозода, раиси Кумитаи кор бо ҷавонон ва варзиш зимни суханони ифтитоҳӣ забони давлатиро таҷассумгари таърих ва ҳуввияти миллат номида, аз ҷумла афзуд: “Забон ин мероси бузурги ниёгони некноми мо, бо вуҷуди мушкилоту монеаҳои зиёд ҳамчун риштаи пайванди насл ба насли миллат аз ҳазорсолаҳои дур то давраи соҳибистиқлолӣ омада расидааст ва решаҳои умри миллатамонро оби ҳаётбахш додааст. Бинобар ин, арҷгузорӣ ба забони давлатӣ, ки ҳамчун рукни муҳимтарини ҳастии миллат, пойдевори асосии давлатдорӣ ва фарҳангу маънавиёти халқамон нақши барҷаста дорад, вазифаи инсониву виҷдонии ҳар як фарди бонангу номус ба ҳисоб меравад. Маҳз ба ҳамин хотир, мо забонро мисли Истиқололият, Ватан, Модар ва фарҳанг аз ҷумлаи муқаддасоти миллии худ мешуморем ва азизу гиромӣ медорем”.

Дар идома Қосимов Саъдӣ, муовини аввали ректори Донишгоҳи давлатии омӯзгории Тоҷикистон ба номи С. Айнӣ қабл аз ҳама тамоми соҳибзабонон ва аҳли нишастро ба муносибати Рӯзи забони давлатӣ табрику таҳният гуфта, зимни ироаи маърӯзаи хеш доир ба ҳалли мушкилоти имрӯзаи забон суханронӣ намуданд. Ӯ гуфт: “Баъд аз гузашти солҳо давлати миллии мо бо роҳбарии Эмомалӣ Раҳмон дар назди зиёиён ва фарҳангиёни тоҷик ба хотири равнақу густариши забони тоҷикӣ ва ба ҳамин восита пешрафти фарҳанги миллӣ вазифаҳои бомасъулиятро мегузорад. Имрӯз, ки мо дар арафаи Иди забон қарор дорем, бояд ба назари интиқодӣ таҳқиқоту пажӯҳишҳои забоншиносии худро таҳлилу баррасӣ намуда, самтҳои асосӣ ва бунёдии густаришу такомули илми забони тоҷикиро муайян намоем. Ин самтҳо бояд масъалаҳои дохил шудани забони тоҷикӣ ба фазои иттилоотии техникӣ, ба забони тавонои илмӣ табдил ёфтани забони давлатӣ, таҳияи истилоҳоти илмиву техникӣ ва ҳамгунсозиву меъёр кардани истилоҳоти соҳавӣ, таҳияи меъёрҳои илмии забони адабии навишторӣ ва гуфторӣ дар асоси меъёрҳои таърихии густариши забон ва бисёр масъалаҳои дигари муҳими рушди забони моро дар бар гирад”.

Дар ҷараёни конфронс ҳамчунин маърӯзаҳои Шоҳзамон Раҳмонов, доктори илми филологӣ, профессори Институти забон ва адабиёти Академияи илмҳо, Ширин Амонзода, муовини раиси Кумитаи рушди сайёҳӣ, Муминов Муҳаммад, мутахассиси Кумитаи забон ва истилоҳот ва як қатор ҷавонони дигар шунида шуд.

Пас аз ироаи маърӯзаҳо миёни иштирокдорони конфронс музокира ва суолу ҷавоб сурат гирифта, андешаҳои олимону муҳаққиқони ҷавон шунида шуд.



Эзоҳи худро нависед



Рамзҳо дар расм

Рӯзнома

Назарсанҷӣ

  1. Ба фикри Шумо “Соли ҷавонон” чӣ гуна сипарӣ шудаистодааст?

Тақвим

Дш Сш Чш Пш Ҷ Ш Яш
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30 31 1 2 3 4

Октябр 2018 c.