Ҷумҳурии Тоҷикистон бо Ҷумҳурии Қирғизистон 3,71 км сарҳади байнидавлатиро мувофиқа намуданд.

Дар ин бора Агентии иттилоотии “Ховар” хабар медиҳад.

Бино ба иттилои манбаъ, ин тавофуқ 5-уми феврал зимни вохӯрии гурӯҳҳои кории топографии дуҷониба сурат гирифтааст.

- Дар асоси мувофиқаи дуҷониба, аз 30 январ то 5 феврали соли 2024 дар шаҳри Бодканди Ҷумҳурии Қирғизистон вохӯрии навбатии гурӯҳҳои топографӣ ва кории масъалаҳои ҳуқуқии ҳайатҳои ҳукуматии Ҷумҳурии Тоҷикистон ва Ҷумҳурии Қирғизистон оид ба делимитатсия ва демаркатсияи сарҳади давлатӣ баргузор гардид, - омадааст дар хабар.

Гуфта мешавад, ки вохӯрӣ дар фазои дӯстӣ ва ҳамдигарфаҳмӣ доир гардида, ҷонибҳо корро оид ба тавсифи минтақаҳои боқимонда дар вохӯрии навбатӣ, ки дар ҳудуди Ҷумҳурии Тоҷикистон баргузор мегардад, идома хоҳанд дод.

Бояд гуфт, ки Ҷумҳурии Тоҷикистон ва Қирғизистон дар тули чор моҳи гузашта навиштаҷоти лоиҳавӣ ва кории тақрибан 196 километри хатти сарҳади давлатиро ба мувофиқа расонида, ба ҳолати имрӯза дар маҷмуъ қариб 90 дарсади гузариши онро анҷом додаанд.

Фарзонаи УМАРАЛӢ, “ҶТ”