СИЁСАТ
Сешанбе 31 Март 2020 03:49
6582
Иқдоме, ки бист ҳазор падару модар аз он хушҳолӣ карданд. Иқдоме, ки бист ҳазор оиларо хушнуд сохт. Иқдоме, ки бист ҳазор ва дучанд аз он кӯдаконро ҷиҳати ин ки падар ва ё модараш ба хона бармегардад, хурсанд гардонид. Иқдоме, ки модари аз ғами фарзанди маҳбусаш шикастаро неруи тоза бахшид. Иқдоме, ки бист ҳазор нафар маҳбасшудагонро ҳадяи беҳтарини зиндагӣ - озодӣ дод. Иқдоме, ки аз он ҷомеаи ҷаҳонӣ ба хубӣ истиқбол намуд. Иқдоме, ки ҳама ба ташаббускораш офарин хонданд ва онро намунаи олии ғамхорӣ нисбати зиндагии озодаи инсоният номиданд. Иқдоме, ки ин ҳама паёмадҳои хурсандибахшро дар пайи худ оварду боиси авфи бист ҳазор маҳбасшудагон дар арафаи ҷашни Рӯзи Конститутсия гардид, ин ба имзо расидани Қонуни Ҷумҳурии Тоҷикистон “Дар бораи авф” аз ҷониби Президенти кишвар муҳтарам Эмомалӣ Раҳмон мебошад.

Санаи 25 октябри соли ҷорӣ Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба Қонуни Ҷумҳурии Тоҷикистон “Дар бораи авф” имзо гузоштанд. Ин қонун дар асоси принсипи инсондӯстӣ ва ба муносибати ҷашни 25-солагии Конститутсияи Ҷумҳурии Тоҷикистон рӯзи 16 октябри соли ҷорӣ ба Маҷлиси намояндагони Маҷлиси Олӣ аз ҷониби Президенти Ҷумҳурии Тоҷикистон пешниҳод шуда буд. Қонун “Дар бораи авф” ба зиёда аз 20 ҳазор шахсоне, ки ҷиноят содир кардаанд, аз ҷумла, нисбат ба ноболиғон, занон, маъюбон, шаҳрвандони хориҷӣ ва дигар шаҳрвандон татбиқ карда мешавад.

Пас аз оне, ки ба имзо расидани қонуни мазкур расонаӣ гардид, тамоми аҳли ҷомеа аз иқдоми навбатии Президенти кишвар муҳтарам Эмомалӣ Раҳмон истиқбол намуда, онро нишони баланди инсондӯстӣ номиданд. Дар пайи ин иқдом пеш аз ҳама шодии маҳбасшудагон ва аҳли оилаи онҳо ҳадду канор надошт. Зеро тавассути ғамхории навбатии Пешвои миллат беш аз бист ҳазор зиндонӣ озод гардидаву ба ҳаёти осоишта баргаштанд.

Санаи 29 октябри соли 2019. Назди дари Сарраёсати иҷрои ҷазои ҷиноятӣ, Муассисаи тафтишотии ЯТ 9/1 лабрези одам буд. Яке ашки шодӣ аз авф гардидани шавҳараш мерехту дигаре аз озод гардидани ҷигарбандаш хушҳолӣ мекард ва саввумӣ бошад, баҳри хуб пешвоз гирифтани бародари солҳо зиндонӣ гардидааш омодагӣ мегирифт.

Дар мушоҳидаи ин манзараи лабрези шодӣ хандаҳои хушҳолонаи гулдухтари хурдсоле диққатамро ҷалб кард. Ӯ бо чеҳраи беғашаш аз он ки падараш ба озодӣ мебаромад, хурсандӣ мекард.

Ҳар яке пас аз хондани таблое, ки дар он исми авфгардидагон навишта шуда буд ва ёфтани номи наздиконаш хушҳол мегардиду ба Президенти кишвар муҳтарам Эмомалӣ Раҳмон изҳори сипос менамуд, ки бо шарофати имзо кардани Қонуни Ҷумҳурии Тоҷикистон "Дар бораи авф" садҳо нафар маҳбасшудагон ба озодӣ мебароянд.

Замоне ки ҳама интизори баромадани авфшудагон буданд, хурсандӣ ва ашки шодии модаре таваҷҷуҳи ҳамаро ба худ ҷалб кард. Бибигул Холова яке аз нафароне буд, ки интизори баромадани писараш буду аз иқдоми пешгирифтаи Роҳбари давлат бениҳоят хушҳол. Ӯ ашки шодӣ мерехту дар ҳаққи Президенти кишвар барои чунин ғамхорӣ ва авф намудани писари маҳбасияш изҳори миннатдорӣ мекард. Ин модари азиз роҷеъ ба авф гардидани писараш бо хурсандӣ гуфт:

“Аз Президенти кишвар муҳтарам Эмомалӣ Раҳмон бениҳоят миннатдорем, ки ғами мо-модаронро хӯрда, фарзандам Холов Илҳомҷонро дар баробари дигар зиндониён авф карданд. Ин барои модар хушбахтии бузург аст. Имрӯз хеле хушҳолам, ки писари ман низ дар қатори авфгардидаҳо ба озодӣ мебарояд. Ин ғамхорие, ки Роҳбари кишвар карданд, ҳаргиз аз хотири мо фаромӯш нахоҳад шуд. Зеро бо ин иқдом чандин хонавода хурсанд гардиду падару модар аз он шод. Ташаккур ба Пешвои миллат барои чунин дастгирӣ. Назди Худованд дуо менамоем, ки Сарвари давлати мо ҳамеша болои сари мо бошанд”.

Давлатова Давлатпошо низ дар баробари дигарон пушти дар баромадани бародарашро интизор буду аз он хушнудӣ мекард, ки дар пайи қонуни авф додараш ба озодӣ мебарояд. Ҳангоми суҳбат ӯ гуфт: “Хурсандие, ки имрӯз онро ба мо Пешвои миллат муҳтарам Эмомалӣ Раҳмон ҳадя карданд, ҳадду ҳудуд надорад. Ба Роҳбари давлат раҳмат мегӯям, ки чунин иқдоми беназирро рӯи даст гирифтанд ва ҳазорҳо нафар маҳбасшудагон ба озодӣ баромада истодаанд. Хурсандам, ки додарам Давлатов Салоҳиддин имрӯз дар натиҷаи ғамхории Президенти кишвар ба озодӣ мебарояд”.

Ҳама интизори баромадани наздиконашон буданд. Ва ниҳоят дари маҳбас боз шуду ҳар яке ба истиқболи шахси наздикаш шитофтанд, то замони солҳо аз ҳам дуриро аз байн бубаранду якдигарро бо самимият ба оғӯш гиранд. Модаре хурсандона фарзандашро пешвоз мегирифту нафари дигар яке аз наздикони худро. Ҳамагӣ хушҳол буданду шод. Баъди аз байн рафтани интизориҳои тӯлонию ҷудоӣ ва расидан ба дидори якдигар авфшавандаҳою наздикони онҳо бо шукргузорӣ аз кишвари орому осуда аз ин иқдоми инсонпарваронаи Сарвари давлат муҳтарам Эмомалӣ Раҳмон изҳори сипос менамуданд.

Баъди ба имзо расидани Қонун “Дар бораи авф” ҳар рӯз мо шоҳиди ба озодӣ баромадани ҳазорҳо нафар зиндониён гардидаву онро тавассути оинаи нилгун дида истодаем. Ҳар як нафаре, ки дар асоси қонуни мазкур авф гардида, ба озодӣ баромадааст, миннатдории худро ба Пешвои миллат баён менамояду ваъда медиҳад, ки дигар даст ба ҷинояткорӣ назада, роҳи дурусти зиндагиро интихоб менамояд. Воқеан, ин ташаббуси Президенти кишвар боз як имконияти нав барои онҳоест, ки хато кардаву паси панҷара нишастанд ва дар натиҷаи Қонун “Дар бораи авф” ба озодӣ баромаданд.

Қонун “Дар бораи авф”-е, ки ин навбат нисбати беш аз 20 ҳазор нафар зиндониён аз ҷониби Президенти кишвар муҳтарам Эмомалӣ Раҳмон ба имзо расид, бори аввал набуда, дар даврони соҳибистиқлолӣ чунин иқдоми башардӯстона чандин маротиба амалӣ карда шуда, дар пайи он ҳазорҳо нафар зиндониён авф гардидаанд.

Татбиқи санадҳои авф дар солҳои 1992-2019 дар Ҷумҳурии Тоҷикистон чунин мебошанд: 29-уми марти соли 1993 нисбат ба 112 нафар, 25-уми августи соли 1994 нисбат ба 5644 нафар, 7-уми апрели соли 1995 нисбат ба 84 нафар, 1-уми августи соли 1997 нисбат ба 1811 нафар, 13-уми ноябри соли 1998 нисбат ба 9384 нафар, 14-уми майи соли 1999 нисбат ба 56 нафар, 29-уми августи соли 2001 нисбат ба 20 406 нафар, 18-уми августи соли 2006 нисбат ба 13 850 нафар, 20-уми июни соли 2007 нисбат ба 9373 нафар, 3-юми ноябри соли 2009 нисбат ба 12 300 нафар, 20-уми августи соли 2011 нисбат ба 17 573 нафар, 29-уми октябри соли 2014 нисбат ба 14 739 нафар, 24-уми августи соли 2016 нисбат ба 11 893 нафар ва 25-уми октябри соли 2019 нисбати зиёда аз 20 000 нафар.

Бино ба маълумот шумораи авфшудагон, ки дар натиҷаи татбиқи санадҳои авфи солҳои 1992-2016 аз адои ҷазо озод шудаанд, 121 561 нафарро ташкил медиҳад.

Ба таъкиди коршиносон иқдоми навбатии хайрхоҳонаи Президенти кишвар муҳтарам Эмомалӣ Раҳмон хусусияти тарбиявӣ низ дорад. Нафароне, ки зери татбиқи Қонуни Ҷумҳурии Тоҷикистон “Дар бораи авф” қарор гирифтанду аз адои минбаъдаи ҷазо озод гардиданд, бояд дар озодӣ ҷои худро дар ҷомеа ёбанд, ба ҳаёти осоиштаи муътадил баргарданд, ба қадри тинҷиву оромӣ, сулҳу субот расанд ва ислоҳ гарданду дигарбора даст ба ҷиноят назананд.

Дар ҳамин ҳол Давлатова Давлатпошо, яке наздикони авфшудаҳо, гуфт: “Онҳое, ки имрӯз бо шарофати ғамхории Президенти кишвар ба озодӣ мебароянд, бояд шукронаи тинҷиву оромӣ намоянду роҳи дурустро интихоб кунанд. Зеро ҳеҷ гоҳ кори нохуб шахсро хушбахт намегардонад. Оқибати ҳар амали зишт манфист”.

Воқеан, озодӣ беҳтарин неъмат буда, бояд онро қадр созем ва ба корҳои бад даст назанем. Зеро роҳи нодуруст инсонро гумроҳ менамояду ахиран шахсро паси панҷара мебарад. Пас, нафароне, ки дар пайи қабули Қонун “Дар бораи авф” ба озодӣ баромаданд, бояд ин нуктаро бештар дарк кардаву роҳи дурусти зиндагиро интихоб намоянд, то дубора ҳаёти ширини хешро барбод надиҳанду паси панҷара нанишинанд. Бояд онҳо роҳи дурустро интихоб созанду бо ҷаҳду талоши хеш дар қатори дигар шаҳрвандон саҳми худро дар рушду тараққиёти кишвар гузоранд.

Эзоҳи худро нависед



Рамзҳо дар расм

Рӯзнома

Назарсанҷӣ

  1. Ба фикри Шумо “Соли ҷавонон” чӣ гуна сипарӣ шудаистодааст?

Тақвим

Дш Сш Чш Пш Ҷ Ш Яш
24 25 26 27 28 29 1
2 3 4 5 6 7 8
9 10 11 12 13 14 15
16 17 18 19 20 21 22
23 24 25 26 27 28 29
30 31 1 2 3 4 5

Март 2020 c.