Академияи идоракунии давлатии назди Президенти Ҷумҳурии Тоҷикистон бо мақсади ба роҳ мондани ҳамкориҳои илмӣ, таълимӣ ва методӣ бо донишгоҳҳои хориҷи кишвар дар самти тайёр намудани мутахассисони соҳибкасб, баланд бардоштани савияи дониши устодону донишҷӯён, хизматчиёни давлатӣ дар курсҳои такмили ихтисос, омӯхтани таҷрибаи пешқадам барои баланд бардоштани сифати таълим тавассути технологияи ҳозиразамон, ташкил ва фиристодани устодон ба хориҷи кишвар ҷиҳати ширкат дар семинару ҷаласаҳо, конференсияҳои илмию байналмилалӣ ва табодули таҷрибаи якдигар фаъолият намуда, баҳри густариши ҳамкориҳо як қатор чорабиниҳои судмандро ба роҳ мондааст.

Дар ин бора Ғафурзода Абдухалил, ректори АИДНПҶТ зимни нишасти матбуотӣ ба хабарнигорон иттилоъ дод. Қайд гардид, ки дар 6 моҳи аввали соли 2021 бахши ҳамкориҳо оид ба табодули донишҷӯён ва устодони раёсати робитаҳои байналмилалии академия барои баланд бардоштани савияи дониш ва табодули таҷриба байни донишҷуёни академия ва донишгоҳҳои хориҷи кишвар, 39 нафар донишҷӯёни факултетҳои идоракунии давлатӣ ва муносибатҳои байналмилалӣ тавассути барномаи табодули академӣ дар Донишгоҳи миллии авруосиёгӣ ва Донишгоҳи давлатии иқтисодии Урал тариқи онлайн таҳсил намуда,охири моҳи майи соли ҷорӣ бомуваффақият таҳсилро анҷом доданд.

Ҳамзамон гуфта шуд, ки 17 нафар донишҷӯи академия ҳуҷҷатҳои худро ба донишгоҳҳои Федератсияи Россия пешниҳод намуда, ба муассисаҳои олии ин кишвар тариқи ройгон дохил шуданд.
Инчунин гуфта шуд, ки дар ин давра академия бо ташкилоту муассисаҳои таълимии хориҷӣ 8 шартномаи ҳамкорӣ бастааст, ки 1 изҳороти муштарак, 2 эъломия ва 5 созишномаи ҳамкориҳоро дар бар мегирад.

Исфандиёр АМАКҶОНОВ, “ҶТ”