14 октябр таҳти раёсати раиси Маҷлиси намояндагони Маҷлиси Олии Ҷумҳурии Тоҷикистон Маҳмадтоир Зокирзода ҷаласаи навбатии иҷлосияи дуюми Маҷлиси намояндагони Маҷлиси Олии Ҷумҳурии Тоҷикистон даъвати шашум баргузор гардид.

Дар ҷаласаи мазкур вобаста ба тағйиру иловаҳои ба лоиҳаи чандин кодексҳои амалкунанда қарорҳои дахлдор қабул гардид.

Лоиҳаи қонуни ҶумҳурииТоҷикистон “Дар бораи ворид намудани илова ба Кодекси ҳуқуқвайронкунии маъмурии Ҷумҳурии Тоҷикистон” аз зумраи он лоиҳаҳое буд, ки дар ин ҷаласа мавриди баррасӣ қарор гирифт. Вобаста ба лоиҳаи қонуни мазкур вазири адлияи Ҷумҳурии Тоҷикистон Ашуриён Музаффар Қурбонмуҳаммад суханронӣ намуда, иброз дошт, ки қонуни мазкур ҷиҳати иҷрои дастуру супоришҳои Президенти кишвар, бо мақсади ба роҳ мондани усулҳои пешгиринамудани дахолат ба экстремизм тавасассути ворид ба табдили ҷазои маъмурӣ таҳия шудааст.
- Дар амалия ҳолатҳое ҷой доранд, ки шахс барои баён кардани суханҳои ноҷо, ки метавонад боиси барангехтани кинаю адовати миллӣ, нажодӣ, маҳалгароӣ ва ё динӣ гардад, бо моддаи 189-и Кодекси ҷиноятии Ҷумҳурии Тоҷикистон ба ҷавобгарии ҷиноятӣ кашида мешаванд,- афзуд вазири адлияи кишвар Ашуриён Музаффар Қурбонмуҳаммад.

Инчунин ӯ гуфт: “Дар бисёр мавридҳо шахсе, ки ба чунин кирдор даст мезанад, бинобар надоштани дарки дуруст оқибати манфии амали худро пешбинӣ намекунад ва дар натиҷа ба ҷавобгарии ҷиноятӣ кашида мешавад. Ворид намудани ҷавобгарии маъмурӣ барои бори аввал содир намудани ин гуна кирдорҳо боиси огоҳсозии шаҳрвандон аз оқибатҳои ҳуқуқии чунин кирдорҳо ва пешгирии экстремизм мегардад. Бо дарназардошти ин гуфтаҳо, ба Кодекси ҳуқуқвайронкунии маъмурии Ҷумҳурии Тоҷикистон моддаи 469/1 илова гардидааст. Мутобиқи он инчунин тарғиби бартарии шаҳрвандон аз нигоҳи муносибати онҳо ба дин, мансубии онҳо ба миллат, нажод ё маҳал, агар ин кирдор ба таври оммавӣ ё бо истифодаи воситаҳои ахбори омма ё шабакаҳои алоқаи барқӣ, аз ҷумла интернет содир шуда бошанд, ҳангоми набудани аломатҳои таркиби ҷиноят ба ҷавобгарии маъмурӣ кашида мешаванд. Ҷавбогарии маъмурӣ дар шакли ҷарима ва ҳабси маъмурӣ, аз ҷумла ба шахси ҳуқуқӣ ба андозаи аз 50 то 100 нишондиҳанда барои ҳисобҳо ва ҳабсӣ маъмурӣ ба муҳлати аз 5 то 10 шабонарӯз таъин карда мешавад.”
Лозим ба зикр аст, ки дар ҳолати дубора такрор шудани ҷиноятҳои номбаршуда, ҷавобгарии маъмурӣ ба ҷавобгарии ҷиноятӣ табдил ёфта, тибқи қисми 1 моддаи 189-и Кодекси ҷиноятии Ҷумҳурии Тоҷикистон татбиқи ҷазои маъмурӣ барои чунин ҳуқуқвайронкуниҳо содир шуда бошанд, бо маҳрум сохтан аз озодӣ ба муҳлати аз ду то панҷсол пешбинӣ шудааст.