Гуайдо баргашт ва халқро ба ҳамоиш хонд

Хуан Гуайдо сарвари мухолифони Венесуэла пас аз сафараш ба кишварҳои Амрикои Лотинӣ ба ватан баргаштааст. Аз бозгашти Гуайдо ҳазорҳо нафар дар шаҳри Каракас – пойтахти давлати Венесуэла истиқбол гирифтаанд, ки дар миёнашон дипломатҳои хориҷӣ аз кишварҳои ИМА ва Аврупо низ будааст.

Гуфта мешавад, роҳбари мухолифини Венесуэла як рӯз пеш аз он ки кӯмакҳои башардӯстонаи ИМА аз тариқи Колумбия ба Венесуэла ворид гардид, аз кишвар берун рафта, мамолики минтақаро сайр кардааст. Ӯ дар Эквадор аз тариқи навори мустақим тавассути шабакаҳои иҷтимоӣ эълон доштааст, ки бармегардад.

Гуайдо эҳтимоли дар бозгашт боздошт шуданашро аз тарафи нерӯҳои интизомии Венесуэла шарҳ дода гуфтааст, ки агар маро боздошт ё ба асорат бигиранд, ин яке аз охирин иштибоҳи онҳо хоҳад буд. Ёдрас шудан ба маврид аст, ки пас аз худро роҳбари муваққатии Венесуэла эълон доштани Хуан Гуайдо аз қаламрави кишвар берун рафтанашро Суди олии Венесуэла манъ кардааст.

“Аз хавфу таҳлукаҳо огоҳем, пешрафтро идома медиҳем”

Бино ба иттилои хабаргузории БиБиСи Гуайдо зимни суханрониаш дар фурудгоҳи Каракас чунин гуфтааст: “Ҳоло дар Венесуэла ҳастем. Аз хавфу таҳлукаҳо огоҳем ва пешрафтро идома медиҳем”.

Дар ҳамин ҳол, мардуми Венесуэларо ба гирдиҳамоӣ даъват карда, изҳор доштааст, бо ширкатҳои байналмилалӣ вохӯрда, аз онҳо даъват кардааст, ки ба бахши тандурустӣ ва энергетика сармоягузорӣ кунанд. Тибқи гуфтаҳои ӯ ширкатҳо ҳам ба ин масъала таваҷҷуҳ доштаанд.

Шарҳи ИМА ва Аврупо

Ҷон Болтон мушовири амнияти миллии Президенти ИМА дар паёме, ки аз тариқи шабакаи Twitter нашр кардааст, чунин ҳушдор медиҳад: “Ба ҳар гуна хатаре, ки бозгашти босуботи Хуан Гуайдоро таҳдид мекунад ё бо нерӯ ё бо дигар восита муқобилат карда мешавад”.

Федерика Моғерӣ намояндаи олии Иттиҳоди Аврупо оид ба робитаҳои беруна гуфтааст, ки амнияти Гуайдо ба ҳар навъе, ки халалдор карда шавад, ин маънои авҷи бесуботиро дошта, аз тарафи ҷомеаи байналмилаӣ маҳкум мегардад.

Маврид ба зикр аст, ки дар ибтидои соли равон роҳбари мухолифини Венесуэла Хуан Гуайдо, ки дар парлумони ин кишвар роҳбарии намояндагони мухолиф ба ҳисоб мерафт, ҳукумати кишвараш, бахусус президенти он Николас Мадуроро сабабгори буҳрони иқтисодии кишвар хонда, талаби истеъфояшро намуд. Пасон худро роҳбари муваққатии кишвар эълон кард. Тавре дар боло ишора кардем, ӯро як гурӯҳ роҳбарони кишварҳо, хусусан кишварҳои ҳамсоя ҷонибдорӣ мекунанд. Николас Мадуро бошад аз ҷонибдории Русия, Куба, Туркия ва чанд давлати дигар бархурдор аст.

Дар ин кишвар норасоии маводи озуқа ва доруворӣ буҳрони амиқи иқтисодӣ ва аз пушти он буҳрони сиёсиро ба миён овардааст. Теъдоде аз сокинони Венесуэла (2,5 миллион нафар) кишварашонро тарк кардаанд.

Поёни ин ихтилофу ин буҳронҳо ба куҷо мебарад, мисле ки маълум аст...