Дар Донишгоҳи давлатии ҳуқуқ, бизнес ва сиёсати Тоҷикистон дар асоси лоиҳаи Моҳномаи Қаҳрамонони Тоҷикистон таҳти унвони  «Пешвои миллат, Президенти Ҷумҳурии Тоҷикистон Эмомалӣ Раҳмон – Қаҳрамони Тоҷикистон» дар иртибот ба ҳаёту фаъолияти ибратомӯзи фарзанди фарзонаи миллат, муҳтарам Эмомалӣ Раҳмон конференсияи илмӣ-назариявӣ доир гардид.

Ҷӯразода Ҷамшед Ҳабибулло, ректори донишгоҳ иброз дошт, ки барои миллати мо вожаҳои “Ватан”, “Истиқлолият”, “Озодӣ”, “Ҳувият” арзиши бебаҳо доранду дар айёми мураккаб ва пурфоҷиаи таърихи башар эҳёи дубораи таърихии миллат кори саҳлу осон нест. Дар ин роҳ танҳо халқу миллате муваффақу қодир аст, ки фарзандони сарсупурдаву ҷоннисор ва сарвари оқилу хирадпешаи худро дошта бошад. “Миллати тоҷик дар симои Пешвои миллат, муҳтарам Эмомалӣ Раҳмон чунин шахсияти ормонии худро дарёфт. Бо иқдомҳои роҳнамо, шуҷоату боварӣ, фидо кардани ҳастии худ барои Меҳан, бунёди кохи бебаҳои сулҳу дӯстӣ ва истиқлолият Пешвои пазируфтаи халқ, муҳтарам Эмомалӣ Раҳмон миллати моро ба пирӯзиҳо ва сўйи фатҳи қуллаҳои орзу мебаранд. Дар ин росто, омӯзиши ҳаёту фаъолияти вусъатбори ин абармарди миллат барои насли ҷавон шоиставу воҷиб аст.

Сипас, М. Акмалова, декани факултети сиёсатшиносӣ ва муносибатҳои байналхалқӣ, Б. Алимов, дотсент, мудири кафедраи муносибатҳои байналхалқӣ, Ш. Саидов, роҳбари шӯрои олимони ҷавони донишгоҳ, С. Юсуфов, донишҷӯйи курси чорум дар мавзӯъҳои «Фарзанди фарзонаи тоҷик Эмомалӣ Раҳмон – Пешвои миллат», «Эмомалӣ Раҳмон – Асосгузори сулҳу ваҳдати миллӣ», «Мактаби дипломатияи Эмомалӣ Раҳмон», «Эмомалӣ Раҳмон ва ваҳдати миллӣ дар Тоҷикистон» маърӯза карданд.

Дар фарҷом асарҳои Пешвои миллат, муҳтарам Эмомалӣ Раҳмон, мусаввараҳо ва слайдҳои ҷолиб, китобҳои олимону адибон дар хусуси ҳаёту фаъолияти ибратомӯзи Сарвари давлат намоиш дода шуд.