Дар нимсолаи аввали соли ҷорӣ Ҷумҳурии Тоҷикистон бо 102 мамлакат, аз ҷумла бо 10 кишвари ИДМ ва бо 92 мамлакати хориҷии дур муносибати савдои хориҷиро ба роҳ мондааст, ки аз ин шумора ба 47 давлат маҳсулот содирот мешавад.

Дар ин бора Баҳриддин Сироҷиддинзода, директори Агентии содироти назди Ҳукумати Ҷумҳурии Тоҷикистон имрӯз - 8 август зимни нишасти хабарӣ, иттилоъ дод.

Роҳбари ин ниҳод қайд намуд, ки то ин дам содироти як қатор маҳсулоти кишоварзӣ афзоиш ёфтааст.

- Дар ин давра меваи хушк 4994,1 тонна, зардолу 5313,1 тонна, ангур 4299 тонна, олуболу ва гелос 312,9 тонна, тарбуз 273,9 тонна, мурғҳои зинда 203,6 тонна, марминҷон ва тут 127,2 тонна, қаламфури ширин 59,1 тонна, тухмиҳои сабзавот ва меваҳо 27 тонна қаламфур 1,2 тонна, асали табиӣ 1,1 тонна ва дигар меваҳо 163,6 тонна ба кишварҳои хориҷӣ содир карда шудааст.

Фараҳноз САФАРОВА, “ҶТ”