Имрӯз дар Донишкадаи тарбияи ҷисмонии Тоҷикистон ба номи С. Раҳимов вобаста ба интихоботи навбатии Президенти Ҷумҳурии Тоҷикистон бо иштироки кормандони Кумитаи кор бо ҷавонон ва варзиши назди Ҳукумати кишвар, ташкилотҳои дигари соҳаи варзиш ва коршиносон аз Комиссияи марказии интихобот ва райъпурсии ҷумҳурӣ (КМИР) мулоқоти судманд доир гардид.

Дар вохӯрии мазкур коршиносону намояндагони Комиссияи марказии интихобот ва райъпурсӣ, Кумитаи кор бо ҷавонон ва варзиш ва Маркази миллии қонунгузорӣ вобаста ба моҳияту зарурияти интихоботи Президенти Ҷумҳурии Тоҷикистон ва нақши овози ҳар як овоздиҳанда дар интихоботи дарпешистода, суханронӣ намуданд.

Аз ҷумла, Хидирзода Махфират, намояндаи КМИР иброз дошт: “Умуман, аз нигоҳи сиёсӣ гирем, соли 2020 дар ҳаёти ҷомеаи кишвар соли азими сиёсӣ буд, яъне мо моҳи марти имсол интихоботи парлумони кишварро гузаронидем ва моҳи октябр бошад, баргузории интихоботи Президенти Ҷумҳурии Тоҷикистон дар назар аст”.
  
Нуқтаи дигаре, ки дар ин вохӯрӣ гуфта шуд, ин коркард шудани барномаи мобилӣ таҳти унвони “Тоҷикистон, интихобот, президент” мебошад. Ба таъкиди масъулин он дар махзани барномаҳои мобилии “Плеймаркет” гузошта шудааст, ки он хусусияти иттилоотӣ дошта, дар он қонунҳо, иқтибосҳо аз конститутсия дар бораи интихобот, тартиби иштироки намояндагони ВАО дар интихобот, инчунин мушоҳидони миллӣ ва байналмилалӣ ҷой дода шудааст. Ҳар нафар онро аз интернет барои маълумоти лозима гирифтан, дастрас карда метавонад.