СИЁСАТ
Якшанбе 07 Март 2021 04:20
7559
Фарзанди фарзонаи миллат, шахсияти арзанда, ғамхору дилсӯзи халқ, сиёсатмадори барҷаста Эмомалӣ Раҳмон тӯли 26 сол аст, ки ҳамчун Президент содиқона хизмат менамояд. Яъне ба ибораи дигар гӯем, Пешвои миллат Эмомалӣ Раҳмон собиқаи кории 26-солаи президентӣ дошта, баробар ба Конститутсия дар шинохту ҳифзу ҳимояи давлату миллат, халқу ватан ва шаҳрвандон далерона, мардона, устуворона қадам мезананд.

Мувофиқи Конститутсия дар матни савганди Президент вазифаҳои муҳимтарини ӯ нишон дода шудаанд:

1. Вазифаҳое, ки аз ҳимояи Конститутсия ва қонунҳои ҷумҳурӣ бармеоянд. 2. Аз кафолату таъмини ҳуқуқи озодӣ ва шаъну шарафи шаҳрвандон бармеоянд. 3. Аз ҳифзи сарзамин, истиқлолияти сиёсиву иқтисодӣ ва фарҳангии Тоҷикистон бармеоянд. 4. Вазифаҳое, ки аз хизмати содиқона ба халқ бармеоянд.

Пешвои миллат муҳтарам Эмомалӣ Раҳмон дар тӯли 26 соли дар мансаби Президенти Ҷумҳурии Тоҷикистон будан, ба савганди худ содиқ монда, вазифаҳо ва салоҳиятҳои худро тибқи талаботҳои Конститутсия ва қонунҳои ҷумҳурӣ иҷро карда меоянд. Тавре Пешвои миллат муҳтарам Эмомалӣ Раҳмон иброз намуда буданд:

“Конститутсия ҳамчун бахтномаи миллат ва санади бунёдии сиёсӣ, роҳи минбаъдаи пешрафту тараққиёти давлати озоду демократии моро муайян менамояд. Конститутсияи кишвари Тоҷикистон моро ба ҷомеаи ҷаҳонӣ ҳамчун давлати мустақили дорои низоми мукаммали сиёсиву ҳуқуқӣ муаррифӣ намуд, ки дар он инсон ва ҳуқуқу озодиҳои ӯ арзиши олӣ буда, барои шароити зиндагии арзанда ба ҳар шахс заминаҳои устувори иҷтимоиву иқтисодӣ гузошта шудаанд”.

Бояд зикр кард, ки салоҳияти Президент асосан дар моддаи 69 ва баъзе моддаҳои дигари Конститутсия, қонунҳои конститутсионӣ ва дигар қонунҳо муқаррар шудаанд. Ваколатҳои ҳуқуқӣ-конститутсионии президентро шартан ба чунин соҳаҳо ҷудо кардан мумкин аст: “Дар соҳаи намояндагии Тоҷикистон ва сиёсати хориҷии мамлакат”, “Дар соҳаи таъсис ва барҳам додани мақомоти давлатӣ, таъин ва озод кардани шахсони мансабдори давлатӣ, “Имзо гузоштан ба қонунҳо, боздоштан ва бекор кардани санадҳои мақомоти давлатӣ, “Харҷи сармояи захиравӣ ва муайян намудани низоми пул” ва “Масъалаҳои ҳарбӣ ва таъмини бехатарии давлатӣ”.

Президент дар баробари ҳаллу фасл намудани масъалаҳои додани паноҳгоҳи сиёсӣ ва шаҳрвандӣ масъалаҳои бахшиши ҷазоро ҳал менамояд. Президенти мамлакат бо мақсади авф намудани гуноҳҳои нафарону шахсоне, ки дар давраи ҷанги шаҳрвандӣ ҷиноятҳои вазнин содир карда буданд, шахсан пешниҳод намуд, ки ба чандин моддаҳои Кодекси ҷиноятӣ тағйиру иловаҳо дохил карда шаванд. Ҳатто ҳукми қатлро бекор кард. Тибқи Қонуни Ҷумҳурии Тоҷикистон “Дар бораи авф” тайи солҳои охир ҳазорҳо нафар маҳбусон аз маҳбасхонаҳо озод карда шуданд.

Президент мувофиқи қонунҳои амалкунанда, бо тартиби муайян ва дар асоси Конститутсия шаҳрвандонро бо мукофотҳои давлатӣ, ҷоизаҳои давлатӣ, нишонҳо ва унвонҳои ифтихории Тоҷикистон сарфароз мегардонад. Шаҳрвандони Тоҷикистон аз ин ғамхорӣ ва таваҷҷуҳи Пешвои миллат Эмомалӣ Раҳмон рӯҳу илҳоми тоза гирифта, барои чунин қадрдонӣ изҳори сипос мекунанд ва боз ҳам дилгармона барои халқу ватан ва миллат содиқона хизмат менамоянд.

Конститутсия ва Президент – ҳамқадам ва ҳамнафаси якдигаранд. Зеро тамоми дастовардҳои тӯли 29 соли истиқлолияти давлатӣ ва 26 соли конститутсия ба даст овардаи Тоҷикистони азизамон бемуболиға ба сиёсати хирадмардона ва дурандешонаи сарвари оқилу ғамхорамон Пешвои миллат муҳтарам Эмомалӣ Раҳмон сахт вобаста аст.

Эмомалӣ Раҳмон бо тадбирҳои хирадмандона ва матонату ҷасорати фавқулода кишварро аз вартаи фалокат берун овард, мардуми парешонро сарҷамъ намуд ва садҳо ҳазор ғурбатзадагонро ба Ватан баргардонид. Президенти кишвар Эмомалӣ Раҳмон тавонист, ки Тоҷикистонро дар саросари олам бо Конститутсияи тақдирсоз, мардуми заҳматпешаю меҳнатдӯсту меҳмоннавоз, бо табиати зебою афсонавӣ, чашмаҳои обаш ширин, кӯҳҳои осмонбӯс, сиёсати сулҳҷӯёна ва ташаббусҳои наҷибонааш машҳур гардонад.

Хулоса, маҳз бо заҳмату талошҳои пайгиронаи Асосгузори сулҳу ваҳдати миллӣ – Пешвои миллат муҳтарам Эмомалӣ Раҳмон Тоҷикистон истиқлолият ва Конститутсияро тақвият бахшид ва миллати тоҷик баъд аз ҳазор сол дар роҳи эҳёи давлатдории миллӣ ба дастовардҳои бузурги таърихӣ ноил гардид ва ба сӯи ояндаи нек қадам мегузорад.

Асомуддин АЗИЗОВ, корманди Донишгоҳи давлатии Данғара

Эзоҳи худро нависед



Рамзҳо дар расм

Рӯзнома

Назарсанҷӣ

У вас нет прав на участие в данном опросе.

Тақвим

Дш Сш Чш Пш Ҷ Ш Яш
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30 31 1 2 3 4

Март 2021 c.