Имрӯз бо ибтикори Саридораи ҳифзи сирри давлатии назди Ҳукумати Ҷумҳурии Тоҷикистон дар Кохи афсарон вобаста ба масъалаҳои ҳифзи сирри давлатӣ семинари васеи омӯзишӣ доир гардид.

Дар кори семинар, ки ба мавзӯи масъалаҳои ҳифзи сирри давлатӣ дар матбуот ва дигар воситаҳои ахбори омма бахшида шуда буд, Аҳтам Абдуллозода, сардори Саридораи ҳифзи сирри давлатӣ, Давлат Сафар, муовини Вазорати фарҳанг, кормандони дастгоҳи марказии Саридора, намояндагони воситаҳои ахбори омма ва котибони матбуотии вазорату кумита ва идораҳо иштирок доштанд.

Дар доираи семинар муҳимтарин масъалаҳои соҳаи ҳифзи сирри давлатӣ ва муносибати кормандони воситаҳои ахбори омма нисбат ба онҳо баррасӣ гардида, гуфта шуд, ки расонаҳо дар таҳияи маводҳои иттилоотӣ бояд факту рақамҳоро амиқ санҷанд, то нашри як хабар ё дигар маводи журналистӣ барояшон ҷавобгарии ҳуқуқӣ пеш наорад.

Аҳтам Абдуллозода, қайд кард, ки ҳифзи сирри давлатӣ натанҳо аз мансабдорони сатҳи биланд ё масъулини баланпояи як ниҳоди алоҳида, балки аз тамоми нафароне, ки вобаста ба категорияҳои сиррӣ давлатӣ ба он дастрасӣ пайдо мекунанд, масъулияти баланд мехоҳад. Ӯ вобаста ба ифшо шудани сирри давлатӣ дар шабакаҳои интернетӣ ва расонаҳо сухан ронда, аз бемасъулиятии баъзеҳо изҳори норозигӣ кард.

Ӯ аз ҷумла гуфт, ки барои пешгирии ҳолатҳои огоҳонаву ноогоҳона ифшо шудани сирри давлатӣ дар шабакаҳои иҷтимоӣ айни ҳол лоиҳаи ду қонунро коркард карда истодаанд, то шаҳрвандони синну соли гуногун ҳангоми кор дар интернет ва шабакҳои иҷтимоӣ ҳам масъулият ва ҳам ҳуқуқу уҳдадориҳои худро донанд.

Ҳамчунин, масъулини Саридораи ҳифзи сирри давлатӣ иброз доштанд, ки маълумотҳои вобаста ба сирри давлатӣ дар моддаҳои 13-18-и Қонуни Ҷумҳурии Тоҷикистон “Дар бораи сирри давлатӣ” оварда шудааст.