Дар ифтитоҳи ботантанаи дувумин Бозиҳои ИДМ, ки сар 3 то 15 август дар Беларусия баргузор мегардад, ҳайати Тоҷикистон бо роҳбарии Матлубахон Сатториён, муовини Сарвазири Тоҷикистон иштирок намуд.

Дар ҷараёни сафар муовини Сарвазири Тоҷикистон ҳамроҳи Абдулло Раҳмонзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон ба Донишгоҳи давлатии тарбияи ҷисмонии Белорус ташриф оварда, бо фаъолияти кумитаи тадорукоту ҳамоҳангсозӣ ва маркази матбуотии Бозиҳои варзишии кишварҳои ИДМ шинос гардиданд.

Пас аз шиносоӣ бо равандҳои ташкилии мусобиқаи варзишӣ роҳбари ҳайати Тоҷикистон бо муовини Сарвазири Ҷумҳурии Белорус Игор Петришенко мулоқот намуд. Муовини сарвазири Белорус ба ҷониби Тоҷикистон барои иштироки фаъолонаи варзишгарони Тоҷикистон дар бозиҳо, ки дар 13 намуди варзиш дар ҳайати 132 варзишгар рақобат мекунанд, изҳори сипос намуд.
Ҳамчунин ҳайати Тоҷикистон бо вазири варзиш ва сайёҳии Ҷумҳурии Белорус Сергей Ковалчук мулоқот намуда, бо Маҷмааи ёдгории давлатии “Хатынь” шинос шуда, ба пояи муҷассамаи “Одами таслимнашуда” (“Непокоренный человек”) гулдаста гузоштанд.