СИЁСАТ
Душанбе 20 Май 2024 02:41
7662
Имрӯзи дар толори хурди Кохи “Суғдиён”-и шаҳри Хуҷанд ҷаласаи навбатии Шӯрои кор бо ҷавонони назди Раиси шаҳри Хуҷанд баргузор гардид.

Фирдавс Шарифзода, иҷрокунандаи вазифаи Раиси шаҳри Хуҷанд, Раиси Шӯрои кор бо ҷавонони шаҳри Хуҷанд ҷаласаро ифтитоҳ намуда, ҳозиринро бо рӯзномаи маҷлис ошно сохт.
Дар Шӯро масъалаҳои рафти иҷрои дастуру супоришҳои Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон, Раиси Шӯрои миллии кор бо ҷавонон муҳтарам Эмомалӣ Раҳмон, ки зимни баргузории ҷаласаи Шӯрои миллии кор бо ҷавонон баён гардидаанд ва тасдиқи Нақшаи кори Шӯрои кор бо ҷавонони назди Раиси шаҳри Хуҷанд барои соли 2021 мавриди баррасӣ қарор дода шуд.

Фирдавс Шарифзода гуфт, ки фаъолияти Шӯрои кор бо ҷавонони назди Раиси шаҳри Хуҷанд ва ҷаласаи имрӯза бори дигар шаҳодат аз он медиҳад, ки сиёсати давлатии ҷавонон дар меҳвари сиёсати Ҳукумати Ҷумҳурии Тоҷикистон қарор дорад. Аз ин лиҳоз, масъулинро зарур аст, ки бо ин қишри созандаи ҷомеа ба таври мунтазам, самарабахш ва бо истифода аз усулҳои муосиру таъсирбахш чорабиниҳои мақсаднок амалӣ намоянд.

Сипас, аз руйи масъалаи аввал мудири бахши кор бо ҷавонони шаҳри Хуҷанд Абдувосит Ғафуров баромад намуда, гуфт, ки дар ин самт якҷоя бо сохторҳои дахлдор баҳри иҷрои нақшаи чорабиниҳои мақомоти иҷроияи ҳокимияти давлатии шаҳр оид ба иҷрои дастуру супоришҳо чораҳои амалӣ андешида шуданд.

Иттилоъ дода шуд, ки дар соли сипаришуда 40 аксияҳову ҳамоишҳои тарғиботӣ – ташвиқотӣ ва иттилоотӣ таҳти унвонҳои “Мо ҷавонон амалҳои ифротгароиро маҳкум мекунем!”, “Тарзи ҳаёти солим – интихоби мо ҷавонон!”, “Танзим баракати зиндагӣ!”, “Барои Ватани маҳбубамон хизмат мекунем!”, “Ба Пешвои худ содиқ мемонем!” ва “Ҷавонон – пайрави Пешвои миллат!” баргузор гардида, 14650 нафар дар аксияҳои мазкур иштирок ва 9800 дона маводҳои тарғиботӣ ва варақаҳои иттилоотӣ дастраси аҳолӣ гардид.

Абдувосит Ғафуров таъкид намуд, ки бо мақсади ҷалби ҷавонон ба корҳои ободонию хуррамгардонӣ, ба ин васила тарбия намудани онҳо дар рӯҳияи меҳнатдӯстию созандагӣ, сазовор таҷлил намудани 30 солагии Истиқлолияти давлатии Ҷумҳурии Тоҷикистон ва дар доираи эълон гардидани 1300 рӯзи ободонӣ, 100 рӯзи ниҳолшинонӣ таҳти унвони “Мо ҷавонон ин Ватанро сабзу хуррам мекунем!” 26 маротиба шанбегиҳо, ҳашарҳои дастаҷамъона ва корҳои тозагиву ободкорӣ бо иштироки зиёда аз 2400 нафар ҷавонону варзишгарон баргузор гардида, оромгоҳҳо, боғҳои фарҳангӣ – фароғатӣ, кӯчаву хиёбонҳо, ҳудуди муассисаҳои варзишӣ, соҳили дарё ва ҷӯйбору майдонҳо тоза карда шуданд.

Сипас, оид ба масъалаҳои мазкур мудири шуъбаи кор бо ҷавонони Донишгоҳи давлатии ҳуқуқ, бизнес ва сиёсати Тоҷикистон Мирзоҷон Мирзобоев, табиби ҷавон аз таваллудхонаи шаҳри Хуҷанд Фарида Ҳасанзода, докторанти Донишгоҳи Давлатии Хуҷанд ба номи академик Бобоҷон Ғафуров Шодмон Нурматов ва гирандаи Стипендияи Президентӣ Фарангис Атохӯҷаева ва дигарон баромад намуда, андешаҳои хешро баён доштанд.

Бо мақсади таъмини самаранокии кори Шӯро аъзои он нақшаи мушаххаси кориро барои соли 2021 баъди баррасӣ тасдиқ намуданд.

Фирдавс Шарифзода ҷаласаро ҳусни анҷом бахшида, таъкид дошт, ки ҷавононро лозим аст, бо истифода аз тамоми имконият ва шароите, ки давлат ва Ҳукумати мамлакат барояшон дар таҳсил, кору фаъолият, фароғату беҳдошти сатҳи зиндагӣ муҳайё мекунад, самаранок истифода намуда, пеш аз ҳама сатҳи дониш ва маърифатнокии худро боло бардоранд.

Эзоҳи худро нависед



Рамзҳо дар расм