Аз аввали соли 2022 то инҷониб гурӯҳҳои кории топографии Ҷумҳурии Тоҷикистон ва Ҷумҳурии Қирғизистон тибқи нақшаи ҷадвали тартибгардида 9 вохӯрӣ гузарониданд, ки дар натиҷа як қатор корҳо вобаста ба муайян кардани хати сарҳади давлатии байни Тоҷикистону Қирғизистон ба анҷом расонида шудааст.

Дар ин бора Ориф Хоҷазода, раиси Кумитаи давлатии идораи замин ва геодезии Ҷумҳурии Тоҷикистон зимни нишасти матбуотӣ иттилоъ дод.

Номбурда ҳамчунин зикр кард, ки вохӯрии навбатии ҳарду ҷониб бояд дар Тоҷикистон сурат гирад.

“Тибқи низомнома оид ба ташкили кор ва тартиби гуфтушунид оид ба масъалаи сарҳад, ҷонибҳо ба мувофиқа расидаанд, ки муҳтавои протоколҳо ва асноди иҷрои корҳо махфӣ нигоҳ дошта шавад. Натиҷаи корҳо танҳо пас аз розигии ҳарду ҷониб расонаӣ карда мешавад”,- гуфт Ориф Хоҷазода.

Ҳамчунин қайд карда шуд, ки то имрӯз 626,6 км хати сарҳад ба таври лоиҳавӣ мувофиқа шудааст. Оид ба боқимонда гузариши хати сарҳадӣ комиссияҳои байниҳукуматии ҷонибҳо корбарӣ намуда истодаанд.