Дар нимсолаи аввали соли 2024 аз ҷониби мутахассисони Маркази тадқиқоти стратегии назди Президенти Ҷумҳурии Тоҷикистон беш аз 160 гузоришҳои таҳлилӣ, иттилоотию таҳлилӣ таҳия ва ба Ҳукумати Ҷумҳурии Тоҷикистон ва дигар ниҳодҳои давлатӣ ирсол гардиданд.

Тавре Хайриддин Усмонзода, директори Марказ зимни нишасти матбуотии имрӯз ба хабарнигорон иттилоъ дод, ин гузоришҳо асосан фарогири масъалаҳои сиёсати дохилии кишвар, вазъи минтақа ва ҷаҳон, муҳоҷирати меҳнатӣ ва ғайраҳо мебошанд.

Вобаста ба масъалаи муҳоҷирати меҳнатии беруна гуфта шуд, вақтҳои охир шиддати муҳоҷирати меҳнатӣ кам шуда, айни ҳол дар Ҷумҳурии Тоҷикистон 28 фоиз коҳишёбии муҳоҷирати меҳнатӣ ба қайд гирифта шудааст.

Ҳамчунин, гуфта шуд, паст шудани шиддати муҳоҷирати меҳнатӣ метавонад ҷиҳати ба вуҷуд омадани беш аз 10 ҳазор ҷойҳои корӣ мусоидат намояд.

Дар мавриди муносибати шаҳрвандони хориҷи кишвар бо муҳоҷирони меҳнатии кишвари мо гуфта шуд, ин муносибатҳо ба сиёсати дохилӣ ва муносибатҳои расмии ин кишварҳо бо Тоҷикистон рабт надорад.

- Ҷумҳурии Тоҷикистон ҳама гуна аъмоли ғайриқонунии марбут ба ифротгароию террористиро ҳам дар дохил ва ҳам дар хориҷи кишвар ҳамеша маҳкум мекунад,- изҳор дошт Х. Усмонзода