Кормандони Раёсати ташкили мубориза бар зидди ҳуқуқвайронкуниҳои гумрукии Хадамоти гумруки назди Ҳукумати Ҷумҳурии Тоҷикистон маводи нашъаовари навъи ҳашиш, ки 9 килограмму 086, 6 граммро ташкил дод, мусодира карданд.

Ба иттилои маркази матбуотии Хадамоти гумрук, 25 марти соли 2016 ҳангоми гузаронидани амалиёти фаврии гумрукӣ дар ҳудуди кӯчаи А. Деҳотии шаҳри Душанбе шаҳрванди Ҷумҳурии Тоҷикистон М.У соли таваллудаш 1976, сокини деҳаи Қизил Байрақи ҷамоати деҳоти Меҳнатободи ноҳияи Бохтари вилояти Хатлон бо гумони даст доштан дар муомилоти ғайриқонунии маводи мухаддир дастгир карда шуд.
Ҳангоми кофтукови воситаи нақлиёти тамғаи Мерседес Бенс, рақами қайди далатиаш 03-53 ВХ 01, аз бағоҷи автомашинаи номбаршуда як қуттии кардонӣ дарёфт ва гирифта шуд.

Дар вақти кушодани қуттии номбаршуда 20 (бист) адад бастаҳои селофанпечи рангашон сиёҳ, ки бӯи ғализ доштанд, ошкор карда шуд. Тибқи маълумотномаи коршиносони шуъбаи экспертизаи судӣ вазни холиси маводҳое, ки аз шаҳрванди Ҷумҳурии Тоҷикистон М.У гирифта шудаанд, 9 килограмму 086, 6 граммро ташкил дода, ба маводи нашъаовари навъи ҳашиш мансуб мебошад.

Ҳамин тариқ шаҳрванд М. У бо ҳаракатҳои худ ҷинояти дар моддаи 200, қисми 4 Кодекси ҷиноятии Ҷумҳурии Тоҷикистон пешбинишударо содир намудааст, ки он ҷавобгарии ҷиноятиро барои ғайриқонунӣ соҳиб шудан, нигоҳ доштан, интиқол ё фиристодан, мақсади ба соҳибияти каси дигар додани воситаҳои нашъадор ба миқдори махсусан калон содир намудааст.