Имрӯз дар бинои Маҷлиси Олӣ Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе муҳтарам Рустами Эмомалӣ бо Раиси Маҷлиси бузурги миллии Туркия Нуман Куртулмуш дар ҳузури ҳайатҳои парламентии ду ҷониб мулоқот анҷом доданд.

Дар ин бора аз дафтаи матбуоти Маҷлиси миллӣ хабар доданд. Ба иттилои манбаъ дар даромадгоҳи бинои Маҷлиси Олӣ маросими истиқболгирии меҳмони олиқадр ва аксгирии якҷояи роҳбарони ҳайатҳо баргузор шуда, пас аз боздиди толори ҷаласаҳои якҷояи Маҷлиси миллӣ ва Маҷлиси намояндагон Нуман Куртулмуш дар Китоби меҳмонони фахрии Маҷлиси Олӣ таманниёти худро сабт намуд.

Дар ҷараёни музокирот ҷонибҳо масъалаҳои асосии рушди ҳамкориҳои дуҷониба ва робитаҳои байнипарламентиро мавриди баррасӣ қарор дода, таъкид карданд, ки Тоҷикистону Туркияро робитаҳои муштараки фарҳангиву таърихӣ бо ҳам мепайвандад.

Робитаҳои пайваста ва дӯстии самимонаи сарони ду давлат - муҳтарам Эмомалӣ Раҳмон ва муҳтарам Реҷеп Тайип Эрдоган омили муҳимми таҳкими муносибатҳои судманди дуҷониба мебошанд.

Ба тавсеаи ҳамкориҳои созанда миёни Маҷлиси миллии Маҷлиси Олии Ҷумҳурии Тоҷикистон ва Маҷлиси бузурги миллии Туркия таваҷҷуҳи хос зоҳир гардид.

Ҷонибҳо тавсеаи ҳамкориро дар соҳаҳои афзалиятноки саноату истеҳсолот, аз қабили саноати нассоҷӣ ва коркарди алюминий, фарматсевтӣ ва инфрасохтори сайёҳӣ зарур шумориданд.

Инчунин, коркарди меваю сабзавот, истеҳсоли шарбатҳои табиӣ, намаки ошӣ, хушконидани маҳсулоти кишоварзӣ бо истифодаи фанновариҳои нави соҳа аз самтҳои ояндадори ҳамкорӣ номида шуд.

Зикр гардид, ки анъанаҳои муштараки фарҳангиву маънавӣ барои тавсеа ва такмили ҳамкориҳои фарҳангию гуманитарӣ имкониятҳои бештар фароҳам меоранд. Зимни музокирот ҷонибҳо ҳамчунин масъалаҳои мубрами рӯзномаи байналмилалиро баррасӣ карданд.