Имрӯз дар толори МДТ “Литсейи № 4 барои хонандагони болаёқат”-и шаҳри Душанбе бо ибтикори КИ ҲХДТ дар ноҳияи Шоҳмансур бахшида ба 28- умин солгарди таъсисёбии ҳизб таҳти унвони “Нақши ҲХДТ дар раванди давлатсозии миллӣ” мизи мудаввар доир карда шуд.

Дар мизи мудаввар Каримзода Нилуфар, раиси КИ ҲХДТ дар ноҳияи Шоҳмансур, Ширинбекзода Садриддин, мудири шуъбаи таблиғот ва ташвиқоти дастгоҳи марказии КИ ҲХДТ, Шамсуддинзода Садриддин, директори МД телевизиони “Ҷаҳоннамо”, Набизода Набӣ, директори МД телевизиони “Синамо”, роҳбарони ташкилотҳои ҳизбӣ ва аъзои фаъоли ҳизб ширкат варзиданд.

Нилуфар Каримзода чорабиниро оғоз бахшида, ҳамагонро бахшида ба 28- умин солгарди таъсисёбии ҲХДТ табрику таҳният намуд. Ӯ зимни суханронии хеш қайд кард, ки марҳила ба марҳила бо татбиқи ҳадафу маромҳои созандаи ҲХДТ мардуми шарифи Тоҷикистон ба музаффариятҳои назаррасе ноил гардиданд.

- Ҳамаи талошҳои ҲХДТ барои беҳтар гардонидани ҳаёти шаҳрвандон нигаронида шудааст. Аз ҷумла бо азму талошҳои Раиси муаззами ҳизб, ҷонибдорон ва аъзои он 3 ҳадафи стратегии кишвар - таъмини амнияти озуқаворӣ, баровардани кишвар аз бунбасти коммуникатсионӣ ва расидан ба истиқлолияти энергетикӣ иҷро гардида, ҳадафи чоруми миллӣ - саноаткунонии босуръати кишвар бо маром иҷро шуда истодааст,- иброз дошт Н. Каримзода.

Зимни баргузории мизи мудаввар перомуни нақши ҳизб дар раванди давлатсозии миллӣ баҳсҳо сурат гирифта, гуфта шуд, ки маҳз бо талошҳои роҳбари ҷонфидои ҲХДТ дар раванди давлатдориву давлатсозӣ ба дастовардҳои бузург ноил шудем.

Дар хотима аз ҷониби КИ ҲХДТ дар ноҳияи Шоҳмансур ба иштирокчиёни фаъол ва аъзои ҳизб сипосномаҳо тақдим гардид.

Таҳмина ЮСУФӢ,
Албина МИРЗОҚУЛОВА, “ҶТ”