СИЁСАТ
Ҷумъа 04 Декабр 2020 03:49
7433
Дар Ҷумҳурии Тоҷикистон интихоботи навбатии президентӣ 11 октябри соли 2020 баргузор мегардад. Ҷиҳати сазовор баргузор кардани ин маъракаи муҳимми сиёсӣ мақомоти марбута тадбирҳои зарурӣ рӯйи даст гирифта истодаанд. Аз ҳама муҳим, мардуми Тоҷикистон ба хубӣ дарк мекунанд, ки ширкати фаъол дар интихоботи президентӣ ва интихоби номзади арзанда ва шоиста талаботи давлат ва ҷомеаи демократӣ мебошад.

Аз сӯйи дигар, дар шароити имрӯзаи бархӯрдҳои сиёсию фарҳангӣ ва ташаннуҷи авзои минтақавию ҷаҳонӣ миллати тамаддунсози тоҷик дар пешорӯйи иҷрои вазифаҳои муҳим, аз ҷумла ҳифзи арзишҳои миллӣ, ба назар гирифтани манофеи давлатӣ, тақвият бахшидани раванди суботу амнияти сиёсию иҷтимоӣ, дар сатҳи ба талаботи замон ҷавобгӯ баргузор кардани интихоботи президентӣ ва дар ниҳоят, ба ҷо овардани масъулияти шаҳрвандӣ қарор дорад.

Интихоботи Президенти Ҷумҳурии Тоҷикистон нишони шоистагии давлати миллию демократӣ ва дунявӣ мебошад. Гузашта аз ин, дар силсилаи мақому вазифаҳои баланди раҳбарӣ ва сиёсӣ мансаби президентӣ хеле муҳим ва калидӣ аст. Муҳим ва калидӣ барои он аст, ки мо шакли мудирияти президентиро пазируфтаем ва ин шакли идоракунии давлатӣ бар мабнои дар авлавият қарор доштани салоҳиятҳои президент устувор мебошад.

Зимнан, мақоми президентӣ дар ҳар кишваре аломату нишонаи асосии соҳибистиқлолӣ ва соҳибдавлатӣ буда, шахси Президент, қабл аз ҳама, рамзи шукӯҳу шаҳомати давлату миллат мебошад. Ин аст, ки Президент дар баробари бар дӯш доштани вазифаву масъулиятҳои зиёди сиёсию давлатӣ, кафили сулҳу субот, оромишу амният ва нигаҳдорандаи марзу бум ва миллияту мардумият аст. Ба ин маъно, нафаре аз шаҳрвандони саршиноси кишвар ба мақоми президентӣ сазовор буда метавонад, ки қабл аз ҳама, масъулияти баланди шаҳрвандӣ, қобилияти роҳбарӣ, дониши амиқи сиёсӣ, тафаккури таҳлилӣ ва дидгоҳи миллӣ дошта бошад.

Илова бар ин, шахси президент симои давлат ва миллат аст. Ин аст, ки агар яке аз мушаххасоти болоӣ дар шахсияти Президент мушоҳида нашавад, воқеияти симат ва мансаби президентӣ зери суол меравад. Ба ин маъно, на ҳар нафари муддаӣ метавонад Президент бошад ва рисолати раҳбариро ба таври боистаю шоиста иҷро намояд.

Бозорбой ИБОДОВ,
докторанти (PhD) АМИТ

Эзоҳи худро нависед



Рамзҳо дар расм