СИЁСАТ
Ҷумъа 07 Октябр 2022 07:51
8424
Таҷлили Рӯзи Президент яке аз ҷашнҳои фараҳбахши мардуми тоҷик ба ҳисоб рафта, идест, ки эътимоду эътиқод ва эҳтироми фавқулодаро нисбати Асосгузори сулҳу ваҳдати миллӣ - Пешвои миллат, муҳтарам Эмомалӣ Раҳмон ифода мекунад. Пешвои миллат тӯли 30 соли истиқлолият тавонистанд дар масири ҳифзи миллат, таҳкими сулҳу суботи сартосарӣ ва бақои давлатдорӣ нақши арзандаи хешро гузоранд. То имрӯз таҳти роҳбарияшон ба давлати демократӣ, ҳуқуқбунёд, дунявӣ ва ягонаи Тоҷикистон асос гузоштанд. Ҳамин буд, ки пас аз хизматҳои зиёд дар рушди кишвар мардуми Тоҷикистон якдилона ба муҳтарам Эмомалӣ Раҳмон унвони олии Қаҳрамони Тоҷикистон ва баъдан Асосгузори сулҳу ваҳдати миллӣ - Пешвои миллатро доданд. Дар арафаи Рӯзи Президент бо академик Носирҷон Салимӣ, ки дар таҳияи Қонуни конститутсионии Ҷумҳурии Тоҷикистон “Дар бораи Асосгузори сулҳу ваҳдати миллӣ – Пешвои миллат” нақш доштанд, ҳамсуҳбат шудем.

- Аз нигоҳи шумо зарурати ҷашн гирифтани Рӯзи Президент дар чист?

- Ҳар давлати соҳибистиқлол дорои муқаддасот ва рамзҳои миллиест, ки ҳастии таърихӣ ва рисолатҳои қонунии ӯро таҷассум менамояд, расмият мебахшад ва ҳамчун субъекти ҳуқуқ ва муносибатҳои байналхалқӣ муаррифӣ мекунад. Ин муқаддасот, аз ҷумла рукнҳои бунёдгузори иттиҳоди ҷомеа маҳсуб мешавад, ки талошу пайкорҳои мардумро барои пиёда кардани манфиатҳои миллӣ ва пайрезии ҷомеаи мувофиқ ба хостаҳо ва армонҳои миллии худ ба неруи муташакккили созанда табдил медиҳад. Дар баробари гиромидошти Суруди миллӣ, Парчам ва Нишони давлатӣ, ҳамчун арҷгузории Конститутсия ҷашн гирифтани Рӯзи Президент ба самти мақоми олие, ки кафили татбиқи Қонуни асосӣ ва бад-ин васила ҳифзи муқаддасоти давлатӣ мебошад, як амри мантиқист.

- Пешво доштани як миллат, яъне чӣ? Ифтихор, эътимод, ё?..

- На ҳама роҳбарони давлатҳо ҳамчун Пешвои миллат шинохта шудаву эътироф гардиданд. Бешак, мақоми Пешвои миллат, ки ифодаи иродаи мардум аст, мақоми баланди таърихист. Як шахсияти сиёсӣ вақте ҳамчун Пешвои миллат маъруфияту маҳбубият пайдо мекунад, ки ӯ ба дарки рисолатмандӣ ва масъулияти таърихии худ дар сарнавишти ҳаммиллат, ҳамватанони худ, бахусус, дар лаҳзаҳои ҳассоси тақдирсоз, барои як кишвар барномаи фарогири ваҳдати ҷомеа ва пешрафтҳои сиёсиву иҷтимоӣ ва фарҳангиро фароҳам меоварад. Аз таърихи даврони бостон Куруши Кабир ва аз таърихи асрҳои миёна Исмоили Сомониро метавон ёдовар шуд, ки дар сарнавишти ҳамқавмони худ дигаргуниҳои азими ояндасозро ба вуҷуд оварданд ва барои пешрафту тараққиёти беназири давлату миллат роҳро ҳамвор намуданд.

- Шумо ҳамчун нафаре, ки дар қабул гаштани Қонуни конститутсионии Ҷумҳурии Тоҷикистон “Дар бораи Асосгузори сулҳу ваҳдати миллӣ – Пешвои миллат” ташаббускор будед, пеш аз ҳама мегуфтед, ки қабул гаштани чунин як қонун барои ҷомеаи Тоҷикистон чӣ аҳамият дошт?

- Ҳамаи мо шоҳид будем, ки халқи тоҷик Президенти кишвар муҳтарам Эмомалӣ Раҳмонро берун аз ҳама расмиятҳо, дар нишасту маҳфил ва маҷлисҳо бо сидқу ихлос Пешвои худ мехонд. Шаш сол муқаддам камина ҳамроҳи профессор Холаҳмади Самеъ, устоди Донишгоҳи миллии Тоҷикистон тасмим гирифтем, ки масъалаи ба расмият даровардани ин иродаи мардумро ба ҷомеа пешниҳод кунем. Бо дастгирии комили мардум ва порлумони кишвар қонуни мазкур қабул шуд, ки бидуни тардид аз падидаҳои таърихӣ дар ҳаёти Тоҷикистони навин маҳсуб мешавад.

- Чигунае ки ба мушоҳида мерасад, ин қонун аз ҷониби мардуми кишвар ба хубӣ истиқбол ёфт. Метавонем гӯем, ки бо қабули ин қонун ҷомеаи Тоҷикистон ба хизматҳои Пешвои миллат муҳтарам Эмомалӣ Раҳмон ба таври бояд арҷ гузоштанд?

- Ҳукми қонунро гирифтану ихлосу эҳтироми ҷомеаи Тоҷикистон паём мерасонад, ки халқ ин ҳама қаҳрамониву фидокорӣ ва муҳаббату садоқати Сарвари хешро ба мардуми худ, ба Ватан, ба Тоҷикистони тозаистиқлол бо камоли шукру сипосгузорӣ арҷ ниҳода, дар шахсияту ҳайсияти Пешвои миллат, муҳтарам Эмомалӣ Раҳмон қофиласолори корвону нусрати саодати худро шинохт. Дарвоқеъ, дастоварди бузурги халқи тоҷик аст, ки баъд аз гузашти ҳазорсолаҳо дубора соҳиби давлати худ гардид. Пешвои миллат муҳтарам Эмомалӣ Раҳмон бо эҳёи гузаштаи пуршарафи таърихӣ ва бунёдкориҳои беҳамтои имрӯзаи худ паёмҳои тоҷикони ҷаҳонсозу фарҳангсолорро бо сарбаландӣ дар дунёи муосир интишор дод.

- Халқи тоҷик ҳоло мадюни кадом хизматҳои Пешвои миллат аст?

- Баршумурдани хидматҳои Пешвои миллат дар ин суҳбати мухтасар аз имкон берун аст. Дар нахустин суханронии худ дар маснади Раиси Шӯрои Олӣ муҳтарам Эмомалӣ Раҳмон ба эътимод, ба дилу ният ва маслаки худ ва фазлу хиради мардум савганд ёд карданд, савганди садоқат ба ватану миллат, савганд ба дирӯзу имрӯзу фардои тоҷикон, ки чароғашро афрӯхта хоҳанд дошт, бо номбардории муносиб ба ниёгони номовари миллати хеш ба сарманзили мақсуд ҳидоят хоҳанд кард. Эътиборан аз ҳамон рӯз тоҷикон ба ҳама саргузаштҳои таърихӣ, ба ҳама дарду алам ва армонҳояшон барои эҳёи гузаштаи пурифтихор ва зиндагии шоиста дар шахсияти роҳбари нави давлат ҳомӣ, соҳиб ва пуштибони қудратманди худро пайдо карданд, эътиборан аз ҳамон рӯз Эмомалӣ Раҳмон, ки ин рисолатро чун амри эътиқод ба ин ҳақиқат, ки фақат шахсияте бо пойгоҳу чашмандози таърихӣ ва ҷаҳонӣ ба корномаҳои зиндагисоз ва саодатбахш оғоз ниҳоданд.

Ин фазои хуҷастаи инсонӣ ва давлатдории Пешвои миллат дар шинохти рисолат ва тарҳрезии барномаи амал ва ташхиси ҳадафҳои наздику дур бо таваҷҷуҳ ба омилҳои замониву таърихӣ бо камоли хирадмандӣ ба зуҳур омад. Фаъолият ва корсозиҳои Пешвои миллат давра ба давра дар пайвастагии мантиқиву амалӣ бо ҳамдигар ва бо ҳадафҳои сарнавиштсози миллӣ, ба як низоми густарда ва неруманди умури идорӣ мубаддал гардид, ҳама ҷанбаҳои назми кишвардорӣ ва назми зиндагии мардумро дар созгори бо авзои минтақа ва ҷаҳон ба масири пайкараҳои сӯзанда ҳидоят намуд. Ин буд, ки фарҳанги давлатдории Асосгузори сулҳу ваҳдати миллӣ - Пешвои миллат, Президенди Ҷумҳурии Тоҷикистон муҳтарам Эмомалӣ Раҳмон дар миёни мардум ва дар паҳнои ҷаҳон ба масоили низоми матину қавианосир шинохта шуд, ки боризтарин далелҳои он аз вартаи заволу нобудӣ ба сулҳу салоҳ расидани тоҷикон, бунёди далатдории миллӣ ва меъмори ҷомеаи ҳуқуқбунёди дунявӣ буд, ки дар авроқи таърихи ҷаҳони муосир ба ҳукми падидаи нодири сиёсӣ арзёбӣ гардид.

- Аз нигоҳи шумо ба тасмимҳои охири Президенти кишвар дар масъалаи давлатҳои минтақа чӣ гуна бояд баҳо дод?

- Пешвои миллат муҳтарам Эмомалӣ Раҳмон худ дурахшонтарин чеҳрае мебошанд, ки ин рисолати муқаддас дар саропои фитраташон бо шукӯҳи тамом таҷаллӣ кардааст, нахустин тоҷике дар таърихи навин мебошанд, ки дар маснади муаззами роҳбарӣ паёмҳои миллии тоҷиконро дар паҳнои ҷаҳон интишор додаанд ва Тоҷикистонро бо он ҳама сармояҳои бузурги маънавӣ ва тавонмандиҳои кунуниаш дар бунёди давлати демократӣ дар анҷумани кишварҳои дунё аз мақоми арҷманде бархӯрдор намудаанд. Пас, ҳар як фарди тоҷик бояд ба ҳамаи ин ғамхориҳои ин марди хирад расида, дар гул-гулшукуфии кишвар саҳмгузор бошад.

- Таманниёти шумо дар Рӯзи Президент барои халқи тоҷик?

- Дар авроқи таърих, аз оғози тамаддун то имрӯз, қавму миллатҳоро ҳадиси корномаҳои фарзанди фарзона, диловар ва хирадманди тоҷик Асосгузори сулҳу ваҳдати милли - Пешвои миллат, муҳтарам Эмомалӣ Раҳмон мояи ифтихор ва сарбаландии миллати тоҷик ва тамоми тоҷикони ҷаҳон аст. Дар ин рӯзи муборак, ки халқи Тоҷикистон иқболи баланд ва бахти бедори худро ҷашн мегирад, дасти дуо мебардорем, ки мардуми тоҷик бо садоқату ихлос аз Пешвои муаззами худ шукргузорӣ кунанд. Боқӣ, дар масири бунёдкорӣ ва ояндасозиҳо ҳамеша муваффақу пирӯз бошанд.

Эзоҳи худро нависед



Рамзҳо дар расм

Рӯзнома

Назарсанҷӣ

У вас нет прав на участие в данном опросе.

Тақвим

Дш Сш Чш Пш Ҷ Ш Яш
26 27 28 29 30 1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31 1 2 3 4 5 6

Октябр 2022 c.