Вазорати корҳои хориҷии Ҷумҳурии Тоҷикистон ба сафири Русия барои муносибати дағалона нисбати шаҳрвандони тоҷик нотаи эътирозӣ супорид. 

Дар ин бора Вазорати корҳои хориҷии кишвар дар саҳифаи телеграмии худ навиштааст, ки: “Дар нимаи аввали рӯзи 29 апрели соли 2024 ба сафири Русия дар Тоҷикистон С. Григорев ёддошти Вазорати корҳои хориҷии Тоҷикистон бо изҳори нигаронии ҷиддӣ вобаста ба муносибати махсусан дағалона нисбат ба шаҳрвандони Ҷумҳурии Тоҷикистон, инчунин нақзи ҳуқуқ ва озодиҳои онҳо, ки ба таври оммавӣ дар Федератсияи Русия сурат мегирад, супорида шуд”.

Бино ба иттилои манбаъ, дар ёддошт қайд гардидааст, ки ин гуна амалҳо танҳо нисбат ба шаҳрвандони Тоҷикистон амалӣ шуда, ба руҳия ва анъанаҳои муносибатҳои Тоҷикистону Русия комилан мувофиқ нест.

Мавриди зикр аст, ки аз рӯзи 27-уми апрел инҷониб танҳо дар минтақаи нигоҳдории муваққатии шаҳрвандони Фурудгоҳи байналмилалии Внуковои пойтахти Русия 954 шаҳрванди Тоҷикистон бидуни таъмини шароити муносиби санитарӣ қарор доранд.