СИЁСАТ
Душанбе 22 Октябр 2018 06:46
4808
ё чаро наҳзатиҳо ва “обсофкунак”- ҳояшон онро низ сӯиистифода мекунанд?

Амалкарди наҳзатиҳо “як бому ду ҳаво”-ро шабеҳ аст. Чун дигар нақшаҳояшон барбод рафт, хостанд аз набераи Кабирӣ ҷабрдида созанду ба ин васила Ҳукумати Тоҷикистонро золим маънидод намоянд. Баъдтар маълум гардид, ки набудани шиносномаҳои Ҳамза ва модари ӯ на ҷурми ҳукуматдорон, балки натиҷаи бепарвоии оилаи Кабирист. Ҳоло Ҳамза дар хориҷи кишвар қарор дорад ва дар ин кор саҳми масъулини сохторҳои зидахл кам нест. Вале бадтинатони наҳзатӣ ба ҷойи арзи сипос, чунин ранг гирифтани корро “ғолибият” арзёбӣ карданд...

Ба ин монанд “аз пашша фил”-созӣ дар масъалаи фарзанду модари Шабнам Худойдодова - ба ном ҳомии ҳуқуқ низ ба мушоҳида расид. Шабнам кист ва чӣ гуна рисолати модариашро ба ҷой овардааст ҳоҷат ба шарҳу эзоҳ надорад. Идомаи ҳангомасозиро дар қазияи Хайрулло Мирсаидов шоҳид шудем. Далели бебаҳс буду ҳаст, ки парвандаи Мирсаидов рабте ба фаъолияти журналистиаш надошту надорад. Аммо доираҳои манфиатхоҳ маҳз журналист будани номбурдаро ливо карда, хостанд ба обрӯи кишвари мо дар арсаи байналмилалӣ латма зананд. Нотавонбинии ин ашхос то ба ҳаддест, ки озодии Мирсаидовро на ба қонунмеҳварӣ дар Тоҷикистон, балки ба омилҳои аз ин масъала фарсахҳо дур, аз ҷумла қазияи ба ном маҳбусони сиёсӣ (зеро масъулин борҳо иброз доштаанд, ки дар Тоҷикистон маҳбуси сиёсӣ нест) часпонида, ба афкори ҷомеа таъсири манфӣ расониданианд. Ҳол он ки Мирсаидов дар мусоҳибааш бо сароҳат иброз дошт, ки “ман пеш аз ҳама ба қонунҳои Тоҷикистон бовар доштам”. Тибқи анъана дар ин раванд ташкилотҳои мазҳакаофари хориҷӣ ва “обсофкунак” нақши бориз доранд.

Падидаи маъмул аст, ки расонаҳои ба истилоҳ «киссагӣ»-и ТТЭ ҲНИ бо мақсади гумроҳ намудани аҳолӣ тасмимгирии мақомоти ҳифзи ҳуқуқи кишвар, аз ҷумла Суди Олӣ ва Прокуратураи генералиро вобаста ба қатъи фаъолияти ин ташкилоти террористӣ – экстремистӣ фармоишӣ меноманд. Вале намегӯянд, ки тасмимгирӣ дар робита ба ТТЭ ҲНИ комилан асоснок буда, тамоми ибтикори ба ин масъала рабтдошта дар доираи қонун сурат гирифтааст.

Ин “бузургон” ба ҳеҷ ваҷҳ эътироф намекунанд, ки яке аз проблемаҳои ҷаҳони муосир афзоиши хатари терроризм ва экстремизм мебошад, ки аксар маврид зери ниқоби ислом роҳандозӣ мегардад. Ҳол он ки дар асл ислом бо терроризм ва ташкилотҳои экстремистӣ ҳеҷ умумияте надошта, таълимоташ зидди ин падидаҳои номатлуб нигаронида шудааст.

Ҳамватанони азиз бояд дарк намоянд, ки амалкарди мақомоти зидахл дар робита ба ТТЭ ҲНИ бо муқовимат бо ислом ҳеҷ умумият надошта, ҳадаф мубориза бар зидди ҷинояткорон аст, ки ба дин ягон умумияте надошта, ҷинояткории худро бо шиорҳои исломӣ пардапӯш мекунанд. Мутобиқи моддаи 8 Конститутсияи Ҷумҳурии Тоҷикистон таъсис ва фаъолияти иттиҳодияҳои чамъиятӣ ва ҳизбҳои сиёсие, ки нажодпарастӣ, миллатгароӣ, хусумат, бадбинии иҷтимоӣ ва мазҳабиро тарғиб мекунанд ва ё барои бо зӯрӣ сарнагун кардани сохти конститутсионӣ ва ташкили гурӯҳҳои мусаллаҳ даъват менамоянд, манъ мебошад. Аз он ки дар фаъолияти ТТЭ ҲНИ ин омилҳо баръало буд чунин тасмим гирифта шуд. Ҳама медонанд (ҳатто онҳое, ки вонамуд мекунанд, ки намедонанд), ки ТТЭ ҲНИ тасмими бо роҳи ғайриқонунӣ расидан ба қудратро дошт.

Лозим ба ёдоварист, ки дар Ҷумҳурии Тоҷикистон ҳизби мавриди назар аз 4-уми декабри соли 1991 ташкил шуда, фаъолияти он аз соли 1992 то соли 1997 дар ҳудуди Ҷумҳурии Исломии Афғонистон идома ёфта, баъди бастани Созишномаи умумии истиқрори сулҳ ва ризоияти миллӣ дар Тоҷикистон аз 27 июни соли 1997 дар асоси қарори Раёсати Суди Олӣ аз 12 августи соли 1999 фаъолияти он дар Ҷумҳурии Тоҷикистон иҷозат дода шуда, 28 сентябри соли 1999 дар Вазорати адлия ба қайд гирифта шуда буд ва сипас 15 октябри соли 2003 он ҳамчун ҳизби сиёсӣ аз нав ба қайд гирифта шуд. Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ба хотири ваҳдати миллӣ бори дигар ба роҳбарият ва аъзои ин ҳизб имкон дода буданд, ки дар ҳаёти сиёсии кишвар шарик бошад. Мутаассифона, наҳзатиҳо бо суистифода аз озодии фаъолият пайваста пайи рахна кардани амнияти кишвар гашта, даст ба амалҳои хоинона заданд.

Маълумоти мавҷуда аз он шаҳодат медиҳад, ки танҳо дар 5 соли охир (манзур то баста шуданаш аст) зиёда аз 100 аъзои ТТЭ ҲНИ ҷиноятҳои гуногуни вазнин ва махсусан вазнин содир намуда, ба ҷавобгарии ҷиноятӣ кашида шудаанд.

Амалҳои номатлуби аъзои ин ҳизб боиси нооромии авзои сиёсӣ дар минтақаҳои гуногуни кишвар гардида, ҳатто ба куштори даҳҳо нафар шаҳрвандони бегуноҳи Ҷумҳурии Тоҷикистон алоқамандӣ дошт.

Болотар аз “мавҷудият”-и маҳбусони сиёсӣ ёдовар шудем. Бояд гуфт, ба ном маҳбусони сиёсӣ дар гуноҳ ғарқ буда, ҳукми аз ҷониби суд нисбат ба онҳо содиргардида одилона аст. Бинобар даст доштан дар кӯшиши табаддулоти давлатӣ, ки шаби 3 ба 4 сентябри соли 2015 дар ҷумҳурӣ ба вуқӯъ пайваст, аз тарафи Прокурори генералии Ҷумҳурии Тоҷикистон нисбат ба Муҳиддин Кабирӣ, Назарзода А., Маҳмадалӣ Ҳайит ва ҳаммаслакони онҳо бо моддаҳои 179 қисми 3 (терроризм), 1791 (ҷалб кардан барои содир намудани ҷиноятҳои хусусияти террористидошта), 1792 (маблағгузории ҷиноятҳои хусусияти террористидошта), 1793 (даъвати оммавӣ барои содир намудани ҷиноятҳои хусусияти террористидошта), 104 кисми 2 (одамкушӣ), 187 қисми 1 (ташкили иттиҳодияи ҷиноятӣ), 189 (Барангехтани кинаю адовати миллӣ, нажодӣ, маҳалгароӣ ва ё динӣ), 195 қисми 3 (муомилоти ғайриқонунии силоҳи оташфишон), 306 (бо зӯроварӣ ғасб намудани ҳокимият), 307 қисми 2 (даъвати оммавӣ барои бо роҳи зӯроварӣ тағйир додани сохти конститутсионии Ҷумҳурии Тоҷикистон), 307 прим 1 (даъвати оммавӣ дар ба амал баровардани фаъолияти экстремистӣ), 307 қисми 4 (ташкили таълим ё гурӯҳи таълимии хусусияти динии экстремистидошта), 313 (исёни мусаллаҳона) ва 393 қисми 3 (тасарруфи силоҳи оташфишон, лавозимоти ҷангӣ ва техникаи ҷангӣ) Кодекси ҷиноятии Ҷумҳурии Тоҷикистон парвандаҳои ҷиноятӣ оғоз карда шуда, нисбат ба 22 аъзои фаъоли ТТЭ ҲНИ чораи пешгирии ба ҳабс гирифтан татбиқ шуда, тафтишоти пешакии парвандаи ҷиноятӣ бо тартиб додани фикри айбдоркунӣ ба анҷом расонида шуд ва аз ҷониби Суди Олӣ моҳиятан баррасӣ гардид.

Бо ҳукми коллегияи судӣ оид ба парвандаҳои ҷиноятии Суди Олии Ҷумҳурии Точикистон аз 2 июни соли 2016 нисбат ба 14 аъзои раёсати олии ТТЭ ҲНИ бо моддаҳои 187 қ.1, 179 қ.З б. "а", 189 қ.З б "а", 307 қ.З, 313, 32 ч.З- 309, 199 қ.4 б. "а,б", 195 . қ.З, 104 қ.2 б. "а,б,ж,з,и,л,м,п", 32 қ.З - 104 қ. 2 б. "а,б,ж,з,и,л,м,п", 306, 307 4-1 ва 2, 307 қ.2, 302 қ.2 ва 170 КҶ ҶТ гунаҳгор дониста шуда, ба ҷазои якумра маҳрум сохтан аз озодӣ маҳкум шуданд.

Хулосаи ниҳоӣ ин аст, ки ба ном маҳбусони сиёсӣ, вале дар асл ҷинояткорону хоинон мукофоти амали хешро дарёфтанду касе ва ё ягон ташкилоти мазҳакаофару “обсофкунак”-е наметавонанд ин воқеиятро зери суол барад.

Алиҷон САФАРОВ

Эзоҳи худро нависед



Рамзҳо дар расм

Рӯзнома

Назарсанҷӣ

  1. Ба фикри Шумо “Соли ҷавонон” чӣ гуна сипарӣ шудаистодааст?

Тақвим

Дш Сш Чш Пш Ҷ Ш Яш
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30 31 1 2 3 4

Октябр 2018 c.