Табиат муъҷизаҳои зиёде дорад, аммо бо эътирофи умум, муҳимтарину беҳамтояш об аст, зеро ки бе об на зиндагӣ ҳасту на гулу гиёҳ.

Об сарчашмаи ҳаёт буда, имрӯз он ба ҳимоя, тозагию покизагӣ ва сарфакорона истифода бурдан ниёз дорад. Аз ин лиҳоз, бо ташаббуси Пешвои миллат, Президенти кишвар, муҳтарам Эмомалӣ Раҳмон дар Маҷмааи умумии Созмони Милали Муттаҳид бобати Даҳсолаи байналмилалии амал “Об барои рушди устувор, барои солҳои 2018-2028” қатънома қабул гардид. Ин боз як далели барҷастаи муносибати оқилонаву башардӯстонаи Пешвои муаззами тоҷикон нисбат ба об аст, ки мо – ҷавонони соҳибистиқлол онро ба пуррагӣ якдилона дастгирӣ менамоем.

Дар Коллеҷи технологии ба номи А. Қаҳҳорови шаҳри Конибодом дар якҷоягӣ бо бахшҳои ҳифзи муҳити зист, кор бо ҷавонон ва варзиши шаҳр бахшида ба ин рӯйдоди фараҳбахш мизи мудаввар таҳти унвони “Пешвои миллат – наҷотбахши сайёра” гузаронида шуд.

Волонтёри Кумитаи кор бо ҷавонон ва варзиши назди Ҳукумати Ҷумҳурии Тоҷикистон Салимзода Каримҷон қайд кард, ки қабули Қатъномаи Маҷмааи умумии Созмони Милали Муттаҳид оид ба Даҳсолаи байналмилалии амал “Об барои рушди устувор”, ки моҳи декабри соли гузашта дастраси ҳамагон гардид, дар шахсияти Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон кишвари соҳибистиқлоли моро бори дигар ҳамчун давлати пешоҳанг дар ҳалли масоили глобалии ҷаҳон дар меҳвари таваҷҷуҳ қарор дод.

Мутахассиси бахши ҳифзи муҳити зисти шаҳри Конибодом Алиҷон Шехов иброз намуд, ки Тоҷикистон таҳти роҳбарии Сарвари хирадманду ташаббускори хеш имрӯз дар ҷаҳон шӯҳратёр шуда, аз эҳтирому шинохти ҷомеаи ҷаҳонӣ бархурдор аст. Ин ташаббус дар наҷоти аҳли башар аз хатари беобӣ нақши бузурге хоҳад бозид.

Раиси Шӯрои духтарони клуби волонтёрони Кумитаи кор бо ҷавонон ва варзиши ҷумҳурӣ Рафоати Файзалӣ доир ба пазироии гарму самимии ҷомеаи ҷаҳонӣ аз ташаббуси нави байналмилалии Тоҷикистон сухан ронда, аз ҷумла зикр намуд, ки чунин мавқеи сиёсии кишвар дар сатҳи ҷаҳонӣ барои ҳар шахси худогоҳу ватандӯст мояи ифтихору фараҳмандист.

Декани факултети “Менеҷмент, муҳосибот ва иттилооти корӣ”, омӯзгори фанни экология Х. Ёдгорова доир ба дастгирии ташаббуси Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон бо ҷиддият қайд кард, ки ин иқдоми нек аҳамияти ҷаҳонӣ дорад ва тамоми насли башар аз он истифода хоҳад бурд. Чунки об бузургтарин неъмати моддии оламу ҳастист ва баҳри бақою наҷоти кулли мавҷудоти зинда омили асосӣ ба шумор меравад. Мардумони ориёитабор асоси пойдории оламро дар тоза нигоҳ доштани чор унсур: об, хок, бод, оташ донистаанд, ки сарчашмаи пайдоиши ҳама унсурҳо аз об аст.

“Мувофиқи маълумоти оморӣ ҳамасола 5 млн. нафар аз оби ифлос вафот мекунанд ва 3 млн. нафари дигар ба бемориҳои гуногун гирифтор мешаванд, - гуфт гирандаи стипендияи президентӣ Шаҳноза Ҳикматова - Ҳамин ташаббуси байналмилалии Тоҷикистон дар меҳвари таваҷҷуҳи мардуми олам қарор дорад, ки дар рушди захираҳои об нақши равшан хоҳад гузошт”.

Ҳамин тариқ, дар идомаи мизи мудаввар миёни иштирокчиён доир ба роҳҳои истифода аз оби кӯли Сарез ва пешгирии роҳи офатҳои табиӣ баҳсу мунозира сурат гирифт. Дар охир донишҷӯёни Коллеҷ М. Шокирова, М. Шукурова ва Н. Иброҳимова дар мавзӯи моҳият ва манфиати об аз эҷодиёти адибони классику муосири тоҷик шеърҳо қироат карданд.

Р. М. НИЁЗМАТОВА, ҷонишини директори Коллеҷи технологии ба номи А. Қаҳҳоров, шаҳри Конибодом