Хайриддин Усмонзода, раиси навтаъини Маркази тадқиқоти стратегии назди Президенти Ҷумҳурии Тоҷикистон дар мавриди музокирот миёни Ҷабҳаи муқовимати миллии Афғонистон бо раҳбарии Аҳмади Масъуд ва ҳукумати “Толибон” гуфт, ки ҷонибҳо ба мувофиқа нарасиданд.

Раиси МТС, ин нуктаро рӯзи 10-уми феврал зимни нишасти матбуотии ин ниҳод иброз намуд. Ӯ гуфт, баргузор шудани нишаст дар ҳудуди кишварҳои дигар ҳеҷ вақт бар зарари ҷустуҷӯи роҳи ҳалли мусбати масъалаи рӯзмарраи Афғонистон нест ва ҳар кишвар метавонад, вобаста ба он таъсире, ки ба ин гурӯҳҳо дорад, фазоро барои гуфтугӯ пешниҳод кунад.

“Бинобар ин, Тоҷикистон ҳама вақт омода аст, дар робита ба ин масъала фазоро барои ҳамкории ин гурӯҳҳо ба ихтиёрашон қарор диҳад. Минбаъд низ ин масъала дар сатҳ ва шакли дигар ба воқеият табдил меёбад,- гуфт Усмонзода.

Бояд хотирнишон кард, ки ин музокирот дар доираи сафари ахири сарвазири Покистон Имрон Хон ба Тоҷикистон ва мулоқоташ бо Президенти кишвар муҳтарам Эмомалӣ Раҳмон моҳи сентябри соли 2021 мувофиқа шуд буд.

Он замон ин тасмим аз сӯи ҷомеаи Тоҷикистон хуб пазируфта шуд ва онро муваффақияти Президенти кишвар муҳтарам Эмомалӣ Рамҳион унвон карда буданд. Вале то ҳол чунин мулоқот дар Тоҷикистон баргузор нашудааст.