Интихоботи президентӣ яке аз маъракаҳои муҳими сиёсии кишвар буда, дар он шаҳрвандон бояд фаъолона ва бо боварӣ ширкат варзанд ва ба тарафдории номзадҳои интихобнамудаи худ овоз диҳанд.

Имсол дар Ҷумҳурии Тоҷикистон интихоботи президентӣ 11 - уми октябри соли равон баргузор хоҳад шуд.
Охирон интхоботи президентӣ дар Ҷумҳурии Тоҷикистон 6 - уми ноя-бри соли 2013 баргузор шуд, ки то ба имрӯз аз ҷониби Ҳукумати кишвар як қатор пешравиҳо дар самтҳои гуногуни кишвар назаррас аст. Мо дар қисмати сеюм дар мавриди баромад аз бунбасти коммуникатсионӣ, эълон намудани Солҳои рушди деҳот, сайёҳӣ ва ҳунарҳои мардумӣ ва пешравиҳо дар соҳаи тандурустӣ ҳарф хоҳем зад.

Баромадан аз бунбасти коммуникатсионӣ

Ҷумҳурии Тоҷикистон дар тӯли солҳои 2013-2020 ҷиҳати баромадан аз бунбасти коммуникатсионӣ, ки яке аз се ҳадафи стратегии Ҳукумати кишвар ва вазифаи умумимиллӣ буда, сохтмону таҷдиди роҳҳои автомобилгард, оҳан, пулҳо, нақбҳо, фурудгоҳҳо ва дигар инфрасохтори нақлиётиро мутобиқ бо стандартҳои байналмилалӣ дар бар мегирад, талош намуд. Татбиқи ин ҳадаф барои ба мамлакати транзитӣ мубаддал гардидани Тоҷикистон мусоидат менамояд. Пешбинӣ шудааст, ки амалӣ шудани ин ҳадафи стратегӣ беҳтар гардидани дастрасӣ ба бозор, зиёд кардани ҳаҷми тиҷорат дар минтақа, паст намудани арзишҳои хизматрасонии нақлиётӣ ва дар ин замина баланд бардоштани сатҳи зиндагии аҳолиро таъмин хоҳад кард.

Ахиран Ҷумҳурии Тоҷикистон ва кишвари Эрон барои анҷоми корҳои боқимонда дар нақби “Истиқлол” ба мувофиқа расиданд, ки 5,5 миллион долларӣ ҷудо намоянд. Дар умум барои сохтани нақби “Истиқлол” 11 миллион доллар равона мегардад. Вазири нақлиёти кишвар Худоёр Худоёрзода, дар ин бора гуфт, ки ёддошти тафоҳум байни Вазорати нақлиёти Ҷумҳурии Тоҷикистон ва Ширкати тавсеаи манобеи об ва неруи Эрон ба намояндагӣ аз Вазорати неруи Ҷумҳурии Исломии Эрон оид ба анҷоми марҳилаи дуюми лоиҳаи нақби “Истиқлол” дар Тоҷикистон ба имзо расидааст.

Худоёр Худоёрзода, зимни шарҳи санади ҳамкории мазкур дар ҷаласаи палатаи поёнии Парлумони Тоҷикистон гуфт, маблағи мазкур барои корҳои лоиҳакашӣ, харидорӣ, васлу насби системаҳои ҳавотозакунӣ, рӯшноӣ, назорати бехатарӣ ва оташхомӯшкунии нақб равона карда мешавад.

Оғози корҳои сохтмонӣ дар нақби “Истиқлол” ҳанӯз замони шӯравӣ оғоз гардида буд.
   
Созишнома барои идомаи сохтмони нақб миёни Тоҷикистон ва Эрон соли 2003 ба имзо расида буд.
Корҳои асосии нақб соли 2006 анҷом ёфта, бо иштироки сарони ду кишвар ифтитоҳ гардид.

Нақби “Истиқлол” 5,2 километр дарозӣ дошта, дар 90 километрии шимоли Душанбе, дар роҳи мошингарди Душанбе – Хуҷанд ҷойгир аст.
Шоҳроҳҳое, ки имрӯз таҷдиду бунёд шудаанд, дар атрофи худ ташкили чандин инфрасохторҳои истеҳсолӣ-иҷтимоӣ ва тиҷоратиро ба мисли мағозаҳову ошхонаҳо, меҳмонхонаҳову истгоҳҳо, воситаҳои алоқа, ёрии техникиву таъмир, бозорчаҳо ва ғайра, ки аслан барои мусофирони роҳ равона шудааст, мусоидат кардааст. Яъне, дар ин раванд шуғлнокии аҳолӣ, густариши инфрасохторҳои мухталиф ва ҳамин тариқ бунёди арзиши нав, афзудани даромади аҳоливу миллӣ ва маҷмӯи маҳсулоти дохилии кишвар сурат мегирад.

Ҳамзамон Вазорати нақлиёти Тоҷикистон барои сохтмон ва бозсозӣ намудани роҳҳо ва пулҳои мошингузари ҷумҳурӣ наздики 500 миллион доллар маблағ дарёфт намудааст. Вазорати нақлиёти Тоҷикистон, барои амалӣ шудани 11 лоиҳаи вобаста ба сохтмон ва тармими роҳу пулҳо 497,1 миллион доллар ҷудо намудааст. Гуфта мешавад, ки ин 11 лоиҳа ба маблағи 497,1 миллион доллар барои соҳаи нақлиёт ихтисос дода шудааст ва маблағи мазкур барои сохтмони роҳҳои нав ва тармими пулу роҳҳои мошингузар масраф хоҳад шуд.

Танҳо дар шаш моҳ дар вилояти Суғд беш аз ҳазор километр роҳ таъмир шудааст.

Ба феҳрасти лоиҳаҳое, ки мавриди назар қарор гирифта шудаанд, бозсозии роҳҳои Душанбе-марзи Ӯзбекистон - марҳилаи 2, Бохтар - Душанбе - марҳилаҳои 1 ва 2, Кангурт - Балҷувон-Ховалинг ва ғайра мебошанд.

Зимнан дар доираи лоиҳаи мазкур сохтмони нақбу пулҳо низ ба назар гирифта шудааст. Тибқи маълумоти Вазорати нақлиёти Тоҷикистон маблағгузории лоиҳаҳо асосан аз ҳисоби грантҳо ва қарзҳои созмонҳои байналмилалии молиявӣ амалӣ мешавад.

Дар ин замина барои соли 2020 лоиҳаҳои таҷдид ва бунёди қитъаи Обигарм-Нурободи шоҳроҳи Ваҳдат-Қарамиқ (Лахш) ба маблағи 3,5 миллиард сомонӣ, Қалъаихумб - Ванҷ бо арзиши лоиҳавии 2,2 миллиард сомонӣ, Ҳулбук - Темурмалик ба маблағи 200 миллион сомонӣ ва сохтмони пули ҳафтуми дарёи Панҷ миёни Тоҷикистон ва Ҷумҳурии Исломии Афгонистон дар мавзеи Кокул бо 18 километр роҳи мошингард ба маблағи 70 миллион сомонӣ ва дигар лоиҳаҳо оғоз меёбанд.

Ҳоло таҷдиду сохтмони роҳҳои мошингарди Душанбе - Бохтар, Ҳуҷанд - Исфара, Кӯлоб - Шамсиддин Шоҳин, Шкев - Қалъаихумб, Кӯлоб - Муъминобод ба маблағи беш аз 4 миллиард сомонӣ идома дошта, роҳҳои зикршуда то ҷашни 30 - солагии Истиқлолияти давлатӣ ба истифода дода мешаванд.

Ҳамзамон бо дастури Президенти кишвар Вазорати нақлиёт вазифадор карда шуд, ки дар якҷоягӣ бо Кумитаи давлатии сармоягузорӣ ва идораи амволи давлатӣ ҷиҳати дарёфти маблағҳои сармоягузорӣ барои бунёди долонҳои зидди тарма дар қитъаҳои осебпазири роҳи мошингарди Душанбе - Чаноқ ва беҳтарсозии имкониятҳои нақби “Истиқлол” тадбирҳои зарурӣ андешад.
Ҳамчунин, дар асоси дастуру супоришҳои Президенти кишвар муҳтарам Эмомалӣ Раҳмон Вазорати нақлиёт корҳоро дар самти таҳияи лоиҳаҳои таҷдиду азнавсозии роҳи мошингарди Хуҷанд - Конибодом, Бохтар - Данғара - Кӯлоб, Бохтар - Носири Хусрав ва роҳҳои дигар ҷоннок менамояд.

Бояд гуфт, ки танҳо дар се соли охир тибқи нақшаи корҳои ободониву бунёдкорӣ ба истиқболи 30 - солагии Истиқлолияти давлатӣ дар шаҳру деҳоти кишвар аз ҳисоби соҳибкорону шахсони саховатпеша ва аҳолӣ 1450 километр роҳҳои ҷумҳуриявию маҳаллӣ ва 108 пул бунёду таҷдид карда шуданд.


Солҳои рушди деҳот, сайёҳӣ ва ҳунарҳои мардумӣ

Дар тӯли ҳафт соли охир бо ташаббуси Ҳукумати Ҷумҳурии Тоҷикистон рушди деҳот, соҳаи сайёҳӣ ва ҳунарҳои мардумӣ ба тадриҷ хуб шуда истодааст. Ин аст, ки Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар охирин Паёми худ ба Парлумони мамлакат солҳои 2019-2021-ро Солҳои рушди деҳот, сайёҳӣ ва ҳунарҳои мардумӣ эълон намуданд.

Имрӯз дар кишвар корҳои ободониву созандагӣ, аз ҷумла марказҳои саломатӣ дар деҳот, мактабу кӯдакистонҳо, корхонаҳои нави саноатӣ, биноҳои нави маъмурӣ-маишӣ, шӯъбаҳои корҳои дохилӣ, амният, адлия, суд, нозироти андоз, роҳҳои мошингард, боғҳои фарҳангӣ, қасрҳои фарҳангӣ, зеристгоҳҳои барқӣ, майдончаҳои варзишӣ, таҷдиду азнавсозии НБО идома ёфта истодааст. Дар аксари шаҳру ноҳияҳо майдони Парчам ва Нишони давлатӣ бунёд ёфта, барои истироҳати сокинон боғу гулгаштҳо сохта шудаанд.

Дар доираи татбиқи иқдоми Президенти Чумҳурии Тоҷикистон Эмомалӣ Раҳмон оид ба эҳё ва рушди ҳунарҳои мардумӣ то имрўз даҳҳо мактаби ҳунармандон дар шаҳру ноҳияҳои ҷумҳуриамон ташкил шуда, фаъолият намуда истодаанд. Дар ин мактабҳо аз рӯи усули анъанавии миллии “устод-шогирд” шогирдон тарбия меёбанд.

Аслан, таҷассуми ҳунарҳои миллӣ дар ороиши сару либос, ҷиҳози хона, муҳити зист ва ғайра мушоҳида мешавад. Масалан, барои омўзиши таърихи либос асарҳои санъати тасвирӣ, меъморӣ, адабиёт, ҳуҷҷатҳои таърихие, ки зиндагии маишии мардум ва фарҳанги давраҳои гузаштаро инъикос месозанд, сарчашмаҳои асосӣ ба ҳисоб мераванд.

Ҳамин тавр инъикоси анъанаҳои миллӣ дар офаридани осори ҳунарҳои мардумӣ ба инкишофи ҳисси худшиносӣ, ватандориву ифтихори миллӣ, инчунин такмили маҳорат мусоидат менамояд.

Рушди соҳаи сайёҳӣ самти афзалиятноки сиёсати давлати мо ба ҳисоб рафта, ҷиҳати боз ҳам тараққӣ додани он аз ҷониби Ҳукумати мамлакат вобаста ба пардохти андоз ва боҷҳои гумрукӣ як қатор имтиёзҳо пешбинӣ гардидаанд.

Аллакай, дар зарфи соли якуми эълон гардидани “Солҳои рушди деҳот, сайёҳӣ ва ҳунарҳои мардумӣ” дар деҳоти мамлакат як қатор пешравиҳо ба назар расида, рушди сайёҳӣ ва омӯзиши ҳунарҳои мардумӣ идома ёфта истодааст.

То имрӯз дар кишвар зиёда аз 200 ширкати сайёҳӣ фаъолият дошта, 15 лоиҳаи инфрасохтори сайёҳӣ аз имтиёзҳои пешбинишуда бархурдор гардидааст.

Дар нуҳ моҳи соли гузашта беш аз як миллион нафар сайёҳон аз мавзеъҳои нодири кишварамон дидан кардаанд, ки нисбат ба соли қабл 20 фоиз зиёд мебошад.

Ҳамзамон Президенти кишвар Эмомалӣ Раҳмон зимни ироаи Паёми охирони худ бо мақсади ҷалби ҳарчи бештари сайёҳон, пешниҳод намуд, ки ба шаҳрвандони давлатҳои хориҷие, ки ҳуқуқи бо тартиби сода гирифтани раводиди Ҷумҳурии Тоҷикистонро доранд, раводиди навъи сайёҳии бисёркарата дода, муҳлати он то 60 рӯз дароз карда шавад.

Илова бар ин, бо мақсади содагардонии рафтуомади ҳамватанони бурунмарзие, ки зодагони Тоҷикистон мебошанд, раводиди бисёркаратаи сесола дода шавад.

Тибқи маълумотҳои оморӣ дар моҳҳои январ - декабри соли 2019 дар миқёси мамлакат 161 ширкатҳои сайёҳӣ фаъолият намуда, ба сайёҳон хизмат расониданд, ки нисбат ба моҳҳои январ-декабри соли 2018 15 маротиба зиёд аст. Мавриди зикр аст, ки аксари сайёҳони хориҷӣ ба ҷумҳурӣ бе назардошти пешниҳоди хизматрасонии ширкатҳои сайёҳӣ ворид мегарданд.

Тандурустӣ

Соҳаи тандурустӣ дар Ҷумҳурии Тоҷикистон яке аз соҳаҳои муҳими кишвар ба ҳисоб меравад, ки ҳамасола рӯ ба тараққӣ ниҳода, табибони кишвар низ аз таҷрибаҳои давлатҳои хориҷа бархурдоранд, ки ин яке аз муҳимтарин ҳадафи Ҳукумати кишвар ҳисобида мешавад. Бояд зикр намуд, ки давоми қариб се даҳсолаи охир соҳаи тандурустӣ дар мамлакат бомаром рушд карда, то ба имрӯз ба пешравиҳои назаррас ноил гардидааст.

Президенти кишвар муҳтарам Эмомалӣ Раҳмон ба ин соҳа таваҷҷуҳи хосса зоҳир менамоянд. “Мо ба солимии ҷомеа ва ҳифзи иҷтимоии аҳолӣ низ диққати махсус дода, инфрасохтори муассисаҳои тиббӣ ва ҳифзи иҷтимоии аҳолиро мунтазам тавсеа ва таҳким бахшида истодаем”,- иброз намуданд дар Паёми имсола.

Бояд гуфт, ки айни замон дар 19 шаҳру ноҳияи мамлакат “Барномаи кафолатҳои давлатӣ оид ба таъмини аҳолӣ бо кумаки тиббию санитарӣ дар ноҳияҳои таҷрибавии Ҷумҳурии Тоҷикистон барои солҳои 2017-2019” амалӣ гардида истодааст ва ин таҷриба давра ба давра тамоми кишварро фаро мегирад.

Дар Рӯзи кормандони соҳаи тандурустӣ Пешвои миллат бо кормандони соҳаи тандурустӣ мулоқот доир намуда, оид ба паҳншавӣ ва паёмадҳои бемории сироятии коронавирус андешаронӣ карда, хизматҳои арзанда, шуҷоати табибон ва ҳамшираҳои шафқатро дар муассисаҳои тиббии кишварамон махсус зикр намуданд.

Сарвари давлат иброз доштанд, табибоне, ки дар ин шабу рӯзҳо дар беморхонаҳои сироятӣ ва муассисаҳои махсусгардонидашуда заҳмат кашиданд, намунаи баланди ватандӯстиву инсондӯстӣ нишон доданд ва садоқати худро ба касби интихобнамудаашон исбот карданд.
Бинобар ин Пешвои миллат муҳтарам Эмомалӣ Раҳмон ба ҳамаи кормандони соҳаи тандурустӣ ва махсусан ба табибону ҳамшираҳои шафқат, ки дар он рӯзҳои вазнин матонату ҷасорат нишон доданд, аз номи Ҳукумати мамлакат самимона изҳори сипосу миннатдорӣ намуда, барояшон саломатӣ ва барори кор орзу карданд.

Ҳамзамон бо амри Президенти мамлакат аз 1 майи соли 2020 иловапулӣ ба музди меҳнати кормандони соҳаи тиб дар ҳаҷми 12,4 миллион сомонӣ ба имзо расид. Ҳамзамон, барои бо маводи ғизоӣ таъмин намудани беморхонаҳо зиёда аз 11 миллион сомонӣ ҷудо карда, сари вақт ба муассисаҳои тиббӣ расонида шуд. Инчунин бо мақсади мубориза ба муқобили коронавирус суратҳисоби махсуси Вазорати тандурустӣ ва ҳифзи иҷтимоии аҳолӣ таъсис дода шуда, то ба имрӯз аз ин суратҳисоб беш аз 4 миллион сомонӣ барои харидории доруворӣ ва таҷҳизот сарф гардидааст. Илова бар ин, аз ҳисоби буҷети Вазорати тандурустӣ ва ҳифзи иҷтимоии аҳолӣ ба маблағи 13,4 миллион сомонӣ доруворӣ ва дигар таҷҳизоти зарурии тиббӣ харидорӣ шудааст.

Дар Рӯзи иди касбии кормандони соҳаи тандурустӣ барои хизматҳои шоиста бар нафъи давлату миллат Сарвари давлат муҳтарам Эмомалӣ Раҳмон нафаронеро, ки дар рӯзҳои душвори паҳншавии пандемияи коронавирус ба касби худ садоқат нишон доданд, бо мукофотҳои давлатӣ сарфароз гардониданд.

Ҳамзамон, бо Фармони Президенти Ҷумҳурии Тоҷикистон “Дар бораи сарфароз гардонидани кормандони соҳаи тандурустӣ барои комёбиҳои меҳнатӣ, фаъолияти фидокорона, эҳсону шафқат, муваффақият дар ҳифзи саломатии аҳолӣ ва расонидани ёрии тиббӣ” ба 53 нафар корманди соҳа аз шаҳру ноҳияҳои мамлакат мукофотҳои давлатӣ - унвони фахрии Корманди шоистаи Тоҷикистон, ордени Шараф дараҷаи I, 3 ордени Шараф дараҷаи II, 27 медали Хизмати шоиста, 17 медали Шафқат ва Ифтихорномаи Ҷумҳурии Тоҷикистон дар вазъияти тантанавӣ супорида шуд, ки ин аз шуҷоату матонати табибони кишвар далолат медиҳад.