Дар Тоҷикистон сол аз сол шумораи занони роҳбарикунанда дар ҳоли афзоиш қарор дорад. Ин нукта имрӯз аз ҷониби раиси Кумитаи занон ва оилаи назди Ҳукумати кишвар Қурбонзода Ҳилолбӣ зимни нишасти хабарӣ баён гардид.

Номбурда дар шарҳи масъалаи занони роҳбарикунанда гуфт: “Таваҷҷуҳи Сарвари давлат нисбат ба пешбарӣ намудани бонувон ба вазифаҳои роҳбарикунанда назаррас буда, сол аз сол теъдоди занон дар хизмати давлатӣ меафзояд. Тибқи маълумоти Агентии хизмати давлатии назди Президенти Ҷумҳурии Тоҷикистон айни замон аз шумораи умумии 5676 нафар кадрҳои роҳбарикунанда 1066 (18,7%) нафарро занон ташкил медиҳанд, ки нисбат ба ҳамин давраи соли гузашта (18,4%) 22 нафар зиёд аст”.

Бино ба иттилои ин ниҳод, аз 1-уми январ то 15-уми июли соли равон тибқи Фармони Президенти Ҷумҳурии Тоҷикистон ва қарорҳои Ҳукумати кишвар 24 нафар занону духтарони лаёқатманд ба вазифаҳои пурмасъули роҳбарикунанда таъин гардидаанд.