СИЁСАТ
Шанбе 18 Август 2018 04:01
4694
Аз 15 то 22 июл дар шаҳрҳои Синдао ва Пекини Ҷумҳурии халқии Хитой Лагери ҷавонони кишварҳои узви Созмони ҳамкориҳои Шанхай (СҲШ) – 2018 баргузор гардид

Дар баробари дигар кишварҳои узви созмони мазкур аз Ҷумҳурии Тоҷикистон низ даҳ нафар ҷавонони фаъоли ҷумҳурӣ дар сеюмин Лагери ҷавонони кишварҳои узви СҲШ-2018 фаъолона иштирок намуданд.

Пас аз маросими расмии кушодашавии Лагери ҷавонон, ки дар шаҳри Синдао ҷараён гирифт, иштирокчиён аз мавзеъҳои таърихию фарҳангӣ ва корхонаҳои саноатии шаҳр дидан намуданд.

Иштирокчиёни лагер рӯзҳои 16 ва 17 июл аввал дар баҳри шаҳри Синдао саёҳат намуда, сипас корхонаҳои бузурги саноатии ин шаҳр, аз қабили корхонаҳои Хайер, Тгуд, Шолии баҳрӣ ва қасри фарҳангӣ - фароғатии Лушан Тайтсини шаҳри Синдаоро тамошо карданд.

Зимни боздиди ҳар яке аз мавзеъҳои таърихию фарҳангии шаҳр аён гардид, ки баробари дигар халқу миллатҳои дунё Ҷумҳурии халқии Хитой низ дорои фарҳанг, таърих ва маданияти худ мебошад.

Иштирокчиён, ки 200 нафар аз 13 давлати дунё - Ҷумҳурии халқии Хитой, Ҳиндустон, Қазоқистон, Қирғизистон, Покистон, Русия, Тоҷикистон, Ӯзбекистон, Афғонистон, Беларусия, Эрон, Муғулистон ва Озорбойҷон буданд, бо ҳам ошноӣ пайдо карда, риштаи дӯстиро мустаҳкам намуданд.

Форуми ҷавонони СҲШ-2018

19 июл, дар шаҳри Синдаои кишвари Хитой дар доираи Лагери ҷавонони кишварҳои узви Созмони ҳамкориҳои Шанхай-2018 (СҲШ) Форуми ҷавонони созмон баргузор гардид.

Дар он иштирокчиён доир ба сиёсати кишварҳои хеш ҷиҳати дастгирии ҷавонон баромад ва суханронӣ намуданд.

Аз Ҷумҳурии Тоҷикистон дар бахши муҳокима ки таҳти унвони “Имкониятҳои нав барои муоширати ҷавонони Созмони ҳамкориҳои Шанхай” доир шуд, Хуҷастаи Мирзовалӣ, омӯзгори Консерваторияи миллии Тоҷикистон дар мавзӯи “Дастгирии ҷавонон дар Ҷумҳурии Тоҷикистон” баромад намуд.

Ӯ зикр намуд, ки ҳадафи сиёсати давлати мо дар соҳаи ҷавонон тарбияи мутахассисони ҷавон, маълумотнок гардонидани онҳо, тарбияи насли дорои ҷаҳонбинии васеъ ва соҳиби ҳисси баланди ватанпарастӣ мебошад.

“Дар ҳамин асос хулоса бароварда мешавад, ки сиёсати давлатии ҷавонон ва нақши он дар ҳаёти ҷамъиятӣ самти асосии Ҳукумати Ҷумҳурии Тоҷикистон ба ҳисоб меравад. Дар Тоҷикистон Роҳбари кишвар ба насли ояндадори ҷавонон боварии комил доранд. Бо ҳамин мақсад бо фармони Сарвари давлат Шӯрои кор бо ҷавонони назди Президенти Ҷумҳурии Тоҷикистон ташкил шудааст. Инчунин, бо назардошти саҳми ҷавонон дар пешрафти соҳаҳои гуногуни ҷумҳурӣ соли 2017 дар Тоҷикистон “Соли ҷавонон” эълон гардид. Дар охир изҳори миннатдории худро ба онҳое, ки тақдири ҷавонони давлатҳои узви Созмони ҳамкориҳои Шанхай барояшон муҳим аст, баён менамоям. Умедворем, ки дар оянда ҳамкорӣ миёни ҷавонони кишварҳои узви СҲШ тавсеа ёфта, дӯстӣ таҳким меёбаду ҳамдигарфаҳмию ҳалли масъалаҳои муҳим дар якҷоягӣ ба роҳ монда хоҳад шуд”,- иброз дошт Хуҷастаи Мирзовалӣ дар охири суханронии хеш дар Форуми ҷавонони СҲШ-2018.

Девори бузурги Чин ва осорхонаи Гугун

Дар рӯзи охири Лагери ҷавонони Созмони ҳамкориҳои Шанхай-2018 иштирокчиёни лагер аз ду ёдгории таърихии Ҷумҳурии халқии Хитой Девори бузурги Чин, ки таърихи куҳан буда, яке аз мавзеъҳои тамошобоби сайёҳони хориҷӣ маҳсуб шуда, дарозии он беш аз 20 километрро ташкил медиҳад, дидан намуда, ҳамчунин осорхонаи Гугунро тамошо карданд. Осорхонаи Гугун қаблан макони иқомати императорони кишвари Хитой буда, дар он 24 император иқомат ва кору фаъолият доштааст.

Ватанамонро боз ҳам ободтару зеботар менамоем!

Боиси хушҳолӣ ва фараҳмандист, ки дар даврони соҳибистиқлолӣ баробари дигар қишрҳои ҷомеа ба ҷавонону нав-расон таваҷҷуҳи махсус зоҳир гардида, имконоту шароити мусоид барои рушди зеҳнии онҳо фароҳам оварда шудааст.

Имрӯз ҷавонони сарбаланди мо натанҳо дар донишгоҳҳои дохил, балки хориҷи кишвар паи таҳсил буда, дорои ихтисосҳои гуногуни замонавӣ гардида истодаанд.

Зимни боздиди Донишгоҳи нафтии Хитой дар доираи Лагери ҷавонони кишварҳои узви Созмони ҳамкориҳои Шанхай аён гардид, ки аз ҷумҳурии мо низ дар донишгоҳи мазкур се нафар аз ҷавонон таҳсил доранд, ки ин яке аз комёбиҳои ҷавонони тоҷик дар роҳи илмомӯзӣ дониста мешавад.

Авзалшоҳ Қаҳҳоров, яке аз ин ҷавонҳост. Авзалшоҳ, 31 марти соли 1992 дар шаҳри Кӯлоби бостонӣ дар оилаи зиёӣ ба дунё омадааст. Ӯ соли 2010 мактаби миёнаи №9-и шаҳри Бохтар (собиқ Қурғотеппа)-ро хатм намуда, соли 2011 ҳуҷҷатҳояшро ба Донишгоҳи омӯзгории Шинҷони (Синзян) шаҳри Урумчӣ музофоти Шинҷон (Синзян) супорида, соли 2015 онро бо муваффақият бо ихтисоси “Забони хитоӣ ва савдо” хатм намудааст. Аз соли 2016 то инҷониб дар Донишгоҳи нафтии Хитой дар факултаи “Омӯзиши забони чинӣ ба хориҷиён” дар ихтисоси “Омӯзгори забони чинӣ ба хориҷиён” дар бахши магистратура таҳсил намуда истодааст.

Вақте аз ӯ доир ба нақши ҷавонон дар рушду нумуъ ва ободу зебо гардидани ватани азизамон – Тоҷикистон пурсон гардидем, гуфт: “Чунон ки аз суханрониҳои Президенти Ҷумҳурии Тоҷикистон муҳтарам Эмомалӣ Раҳмон бармеояд, ояндаи давлату миллат дар дасти ҷавонони баору номус ва бофарҳангу донишманду кордон аст. Бинобар ин мо ҷавонони имрӯза бояд ҳар як дақиқаи умри худро самаранок истифода намоему барои омӯзиши илму фарҳанг ва касбҳои мувофиқ ба талаботи замон ҷаҳду талош намуда, мутахассиси кордону ҳушёр ба воя расем”.

Ба таъкиди ӯ дар ҷаҳони муосир, ки илму техника сония ба сония пеш рафта истодааст, бояд ҷавонон хамеша дар ҷустуҷӯи илму дониш бошанд. “Дар урфият мегӯянд, “забон донӣ - ҷаҳон донӣ. Бинобар ин тавсияи ман ба ҷавонони ин аст, ки пеш аз ҳама онҳо бояд забонҳои хориҷӣ, ба монанди русӣ, англисӣ, хитоӣ ва дигару дигар забонҳое, ки ҳамчун забони байналмилалӣ эътироф шудааст, ба пуррагӣ ва ё ақаллан дар сатҳи муошират омӯзанд. Зеро надонистани забон моро аз бохабар шудан бо фарҳангу маданият ва расму оини дигар кишварҳо боз медорад”, - иброз дошт Авзалшоҳ Қаҳҳоров.

“Тавсияи ман ба ҷавонон ин аст, ки бояд онҳо вақти худро беҳуда сарф накунанд ва аз ҳар гуна роҳҳои бад худдорӣ кунанду зиракии сиёсии худро аз даст надиҳанд. Ҷавонони азиз, биёед ҳама якҷоя омӯхтаву мутахассис гардида, дастаҷамъона ватанамонро боз ҳам ободу зеботар менамоем” - гуфт ӯ дар интиҳои суҳбат.

Лагери ҷавонони кишварҳои узви Созмони ҳамкориҳои Шанхай соли сеюм аст, ки дар Ҷумҳурии халқии Хитой баргузор гардида, омили хуби ошноӣ ва дӯстӣ пайдо намудан миёни ҷавонони кишварҳои узви СҲШ ба ҳисоб меравад.

Душанбе - Синдао - Пекин - Душанбе

Эзоҳи худро нависед



Рамзҳо дар расм

Рӯзнома

Назарсанҷӣ

  1. Ба фикри Шумо “Соли ҷавонон” чӣ гуна сипарӣ шудаистодааст?

Тақвим

Дш Сш Чш Пш Ҷ Ш Яш
30 31 1 2 3 4 5
6 7 8 9 10 11 12
13 14 15 16 17 18 19
20 21 22 23 24 25 26
27 28 29 30 31 1 2

Август 2018 c.