Дирӯз-10 июн Сироҷиддин Муҳриддин, вазири корҳои хориҷии Ҷумҳурии Тоҷикистон бо Ҷан Мин, Дабири кулли Созмони ҳамкории Шанхай, ки бо сафари корӣ дар Тоҷикистон қарор дорад, вохӯрӣ намуд.

Дар ин хусус аз Вазорати корҳои хориҷии кишвар хабар доданд.

Тибқи иттилои манбаъ ҳамсуҳбатон масоили муҳимми рӯзномаи СҲШ бо тамаркуз ба омодагӣ ба ҷаласаи дарпешистодаи Шурои сарони давлатҳои аъзоро, ки 3-4 июл дар Остона баргузор мешавад, баррасӣ карданд.

Ҳамчунин гуфта мешавад, ки ҷонибҳо оид ба масъалаҳои марбут ба такмили Созмон табодули афкор намуданд.

Вазири корҳои хориҷӣ ба Ҷан Мин барои иштирок дар Конфронси сеюми байналмилалии сатҳи баланд оид ба Даҳсолаи байналмилалии амал “Об барои рушди устувор, 2018-2028” изҳори миннатдорӣ намуд.

Гулафшон КАРИМОВА,“ҶТ”