Дар шаҳри Женева конфронси «Geneva Summit for Human Rights and Democracy» («Ҳамоиши Женева оид ба ҳуқуқи башар ва демократия») баргузор гардид, ки дар он роҳбари фирории ташкилоти террористӣ ва экстремистии Ҳизби наҳзати исломӣ - Муҳиддин Кабирӣ ва Темур Варқӣ - думрави Анҷумани озодандешони Тоҷикистон, ки гӯё узви Шӯрои марказии ин анҷуман мебошад, ширкат доштанд. Чун анъанаҳои қаблӣ мавзӯи меҳварии нишастро ба зиндониҳои сиёсӣ бахшида, дар мисоли чанд кишвари ҷаҳон онро ба намоиш гузоштанд. Дар ин росто, ТЭТ ҲНИТ сар ба ташкилотҳои байналхалқӣ мезананд ва худро бегуноҳ нишон додан мехоҳад.

Албатта, маълум аст, ки андешаҳои нопок бо роҳи осоишта амалӣ намешаванд. М.Кабирӣ ҳадафи хешу ҳаммаслаконашро ошкор намекунад, вале пайравонаш вобаста ба ин нишаст даъво мекунанд, ки дар таърихи ин конфронс ҳеҷ гоҳ масъалаи зиндониҳои сиёсии Тоҷикистон матраҳ набудааст ва бори аввал аст, ки исми зиндониҳои сиёсӣ ба рӯйхати маъруфтарин қурбониёни низомҳо ворид мешавад.

Бояд тазаккур дод, номи М. Кабирӣ ҳамчун террорист ва ифротгарои ашадӣ расман аз ҷониби Интерпол дар ҷустуҷӯ қарор дорад, вале вай дар нишасти як созмони ба гуфти худаш бонуфузи байналмилалӣ ширкат кардааст. Чунин менамояд, ки ин созмон кайҳо боз ба ташкилоте табдил ёфта, ки гурӯҳу қувваҳои террористиро сарпарастӣ ва дастгирӣ менамояд. Вақте террорист ва ифротӣ - Муҳиддин Кабирӣ ва Темур Варқӣ дар нишасти чунин созмонҳо озодона ширкат варзида суханронӣ менамоянд ва намояндагони ин созмон онҳоро ба нишаст роҳ медиҳанд, хулоса баровардан мумкин аст, ки магар онҳо ҳомии терроризм ва террористон нестанд!?

Ҳамин аст, ки баъзе ташкилотҳои ҷаҳонӣ вобаста ба имконияту тавонмандии молиявию иқтисодӣ барои пиёда намудани барномаҳои сиёсӣ ҷаҳду талош намуда, дар ин роҳ аз усулҳои фиреби сиёсӣ, дурӯғу туҳмат кор мегиранд. Мисоли равшани инро аз иштироки террористу ифротӣ - Муҳиддин Кабирӣ ва Темур Варқӣ дарк намудан мумкин аст.

Ҳарчанд чунин созмонҳо расман бо давлати Тоҷикистон дар масъалаи мубориза бар зидди терроризму экстремизми ҷаҳонӣ ҳамрадиф бошанд ҳам, вале ҳимояту ҷонибдорӣ аз ТЭТ ҲНИТ боварӣ ва эътимодро коста мегардонад. Аммо, аз ҷониби «Ҳамоиши Женева оид ба ҳуқуқи башар ва демократия» эътироф накардани ТЭТ ҲНИТ ҳамчун ташкилоти террористӣ ва дар конфронси сатҳи байналмилалӣ даъват намудани намояндагони гурӯҳҳои тахрибкор ҳолати ғайричашмдошт намонд. Гузашта аз ин, созмонҳои байналхалқӣ барои амалӣ намудани манфиатҳо аз чунин вазъияти баамаломада истифода мекунанд.

Агарчи қисме аз нақшаҳои ҲНИТ дар хориҷи кишвар амалӣ шуда, тарафдорони худро дар ҷомеаи Аврупо пайдо менамояд. Вале ин ҷаласа бо ҷалби баъзе аз ҷонибдорони ҲНИТ ба вуқӯъ пайваста, аслан дар байни ҷомеаи Аврупо дастгирии васеъ пайдо накардааст, ҳарчанд баъзе аз ниҳодҳои манфиатдори ҳуқуқи байнаналхалқӣ ва роҳбарони пасипардагии ин бозингарон, кӯшиш намуданд, садои ангезаро пуробуранг намоянд. Дар ин маврид, аз тарафи гурӯҳҳои манфиатдори байналмилалӣ ҳуқуқу озодиҳои инсон ва шаҳрванд риоя карда намешавад. Чунки «Ҳамоиши Женева оид ба ҳуқуқи башар ва демократия» нахоста эътироф кунад, ки баъзе нафарони дар ҷаласа иштирокдошта тибқи қонунҳои амалкунандаи Ҷумҳурии Тоҷикистон барои амали террористӣ ва экстремистӣ маҳкум карда шудаанд. Агар ҳар шахс дар кашмакашиҳои сиёсие, ки паёмади террористию даҳшатафканӣ дорад, иштирок карда бошад, пас, бояд ҳатман дар назди қонун ҷавоб гӯяд. На он ки дар конфронсу семинару ҷаласаҳои аврупоӣ пайваста иштирок намояд.

С. ОРИЁНФАР