Ба назар чунин мерасад, ки саросари оламро вабои ҷонситон – коронавирус ба алангаи худ печондаю ҷангу ҷидолҳо ва амалҳои террористӣ ҳам коҳиш ёфтааст. На вусъати амалиётҳо дар Шарқи наздик мушоҳида мегардаду на дар мулки Афғонистони ҷангзада ва дигар ақсои олам. Аз ҷумла, гурӯҳи Боко Ҳарам дар Африқои басо гарм кайҳо аз худ дарак намедиҳад.

Ҳарчанд ИМА тарафдоронашро аз ҳисоби курдҳои шимоли Сурия, дар минтақаи Идлиб танҳо гузошт, лек байни эшон ва ҳарбиёни турк муноқишае мушоҳида намегардад. Ҳукуматдорони турк аз он хавф доранд, ки дар Идлиб мавқеъ ва мустақилият пайдо намудани курдҳо ба ҳамқавмҳои эшон дар Туркия бетаъсир нахоҳад гузошт. Аз ин хотир, ҳукумати Туркия сахт талош дорад, курдҳои шимоли Сурия мустақил набошанд. Айни замон дар ин минтақа ҳам оромӣ ҳукмфармост.

Гӯё коронавирус ҳамаро ба таҳлука афтондаю ҷангу ҷидолҳо фаромӯш шуда бошад.
Ин ҷо танҳо ҳарбиёни Исроил амалиёти ҷангие анҷом додаанду халос. Онҳо якчанд мушак ҷониби мавқеи ҳарбиёни Сурия партоб намудаанд. Ҳамчунин, дар майдонҳои ҷангии Сурия танки замонавии Русия, ки “Армада” номида мешавад, аз санҷиш мегузарад.
Ҳатто гурӯҳи Толибони “беқарор” даст аз куштору вайронкориҳои маъмулии худ боздоштаанд. Толибоне, ки солиёни дароз дар мулки ноороми афғон вазъро боз ҳам муташаннниҷ месозанд. Баҳри ба даст овардани ҳокимияти сиёсӣ.

Ҳукумати Афғонистон бо оғози моҳи мубораки Рамазон ба ҷонибдорони ин гурӯҳ муроҷиат намуда, хост, ки дар ин моҳ аз идомаи амалиётҳои ҷангӣ даст кашида шавад. Пешниҳоди ҳукумат аз ҷониби роҳбарияти Толибон дастгирӣ наёфт. Яъне, онҳо пайт меҷӯянд. Ҳамин ки имкони мувофиқ ба миён омад, шояд дубора ба оғози амалиётҳои ҳарбӣ пардозанд. Ҳоло ҳам қисми зиёди ҳудуди мулки афғон дар тасарруфи ин гурӯҳи ҷангист.

Моҳи феврали соли равон байни Амрико ва Толибон созишнома ба имзо расид. Мувофиқи он ҳукумати Афғонистон мебоист то панҷ ҳазор ҷангиёни асирафтодаи ин гурӯҳро аз асорат озод намояд. Бар ивази он ҳамагӣ ҳазор низомиёни афғон. Яъне панҷ бар ивази як нафар. Ҳарчанд ин барои ҳукуматдорони афғон чандон қобили қабул нест, лек ночор ба иҷрои шартҳои ин созишнома розӣ шудаанд. Аллакай чанд ҳайате аз ҳар ду ҷониб ба озодӣ баромадаанд.

Шояд оромии бар асари авҷи коронавирус чанд муддат ба вуқуъ омода, ба дили баъзеҳо магар зад, ки охирҳои моҳи апрели соли равон дар наздикиҳои шаҳри Кобул, дақиқтараш маҳали Решхори ноҳияи Чоросиёб билохира таркиш ба вуқуъ пайваст. Таркиш дар мавзее ба амал омад, ки он ҷо низомиён ҷойгиранд. Бар асари таркиш се нафар ба ҳалокат расида, чандин нафари дигар ҷароҳат бардошт. Айни замон таркишро ягон ҳаракат ба зимма нагирифтааст. Аз ҷумла, ҷангиёни Толибон ҳам.

Ду ҳарифи асосӣ - президенти афғонистон Ашраф Ғанӣ ва Абдуллоҳи Абдуллоҳ гӯё ба мувофиқа расидаанд. Аз ин хусус Абдуллоҳ иттилоъ додааст. Ба андешаи ӯ чунин мувофиқа имкон хоҳад дод, ноҷӯриҳо байни ҳар ду хотима ёфта, музокирот бо Толибон ба маҷрои нав ворид шавад ва дар рафъи буҳрони бемории коронавирус саъйи якҷоя ба амал ояд.

Албатта, дар кишваре, ки солҳои дароз ҷангу ҷидол идома дораду баҳри соҳиби курсии мансаб шудан аз тақаллубкориҳо фаровон истифода мешавад, ба ифоқа омадани ду рақиб, ду сиёсатмадор шояд ба нафъи ҷомеа бошад. Вале дар ин маврид ҳам бисёр омилҳое, ки боиси тинҷию амонӣ дар ин мулк шуданаш мумкин аст, ба онҳо вобаста нест. Омили асосӣ ин Толибон аст. Гӯё бе ҷанг зиста наметавонанд. Худо ба эшон инсоф диҳаду аз муҳорибаҳо даст кашанд ва ҳама масоилро танҳо бо музокирот ҳал намоянд...