Терроризм имрӯз ба яке аз проблемаҳои умумиҷаҳонӣ табдил ёфта, ҳатто ба муносибатҳои байналмилалии бархе аз мамолики дунё таъсири манфӣ расонидааст. Мисоли равшани ин гуфтаҳоро мо бараъло дар қарордоди Президенти ИМА Доналд Трамп, ки вуруди шаҳрвандони 7 мамлакати мусулмоннишинро ба давлаташ мамнуъ кард, дида метавонем.

Агар ба таҳлили сиёсии ин масъала назар карда шавад, мушоҳида мегардад, ки Трамп ба хотири таҳдиди терроризми байналмилалӣ, алалхусус терроризми исломӣ, даст ба чунин амал задааст. Амалҳои террористии дар шаҳри Парижи Фаронса, Шоҳигарии Белгия, Ироқ, Покистон, Миср ва ахиран дар шаҳри Санкт-Петербурги Русия ба вуқӯъ пайваста, бешубҳа, ҷомеаи ҷаҳониро сахт нигарон карда, тазоҳуроти зиддитеррористиро ба миён овард. Ҷомеаи ҷаҳонӣ бори дигар иқрор шуд, ки терроризм ба ҷуз қатлу куштору таркишу ғорат дигар мақсаде надорад. Террористон бо мақсади ангехтани кинаю адоват ва биму тарс, аввал маконеро интихоб намуда, баъдан онҷо даст ба амалҳои террористӣ мезананд. Ва ба андешаи сарвари ИМА, ин давлат бинобар сабаби ивази роҳбарияташ, ҳадафи навбатии террористон қарор гирифтанаш аз эҳтимол дур нест.

Ҷумҳурии Тоҷикистон низ чун узви ҷудонопазири ҷомеаи ҷаҳонӣ, аз хатару таҳдиди терроризми байналмилалӣ берун буда наметавонад. Дар шароити бӯҳрони иқтисодӣ, ки имрӯз соири кишварҳои оламро фаро гирифтааст, зуҳури терроризм, экстремизм ва сепаратизм вазъиятро дар равобити байналмилалӣ ноором сохта, пайваста ба амнияти кишварҳо таҳдид менамояд. Нигаҳдории осудагиву суботи сиёсӣ, ваҳдат ва якпорчагии Тоҷикистони маҳбуб аз вазоифи аввалиндараҷаи кулли субъектҳои давлат маҳсуб ёфта, ҷомеаи шаҳрвандии моро водор менамояд, ки дар ин масъала бетараф набошанд.

Бо мақсади фаҳмондани оқибатҳои ногувори зуҳуроти терроризму экстремизм ва шомилшавии ҷавонон ба ҳизбу ҳаракатҳои ифротӣ, бевосита Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон дар Паёми хеш ба Маҷлиси Олии мамлакат 22 декабри соли 2016 ба таъкид хатари ҷиддии терроризмро баён намуда аз ҷумла, таъкид карданд: “Моро зарур аст, ки зиракиву ҳушёрии сиёсиро аз даст надода, мардум ва дар навбати аввал наврасону ҷавононро аз оқибати равандҳои манфии муосир огоҳ созем ва онҳоро аз таъсири хатарноки ҳар гуна равияву ақидаҳои бегона эмин нигоҳ дорем”.

Дар робита ба ин таъкиди Пешвои миллат қариб ҳамаи сохторҳои қудратии мамлакат, вазорату идораҳо, созмонҳои ҷамъиятӣ ва кулли мардуми кишвар бори дигар масъулияти хешро эҳсос карда, ба баргузории мулоқоту вохӯриҳо, конфронсу маҳфилҳо ва чопи маводи зиддитеррористӣ дар васоити ахбори оммаи мамлакат шуруъ карда, хушбахтона, бо ин амали хеш сазовори дарку фаҳмиш ва боварии ҷавонон гардидаанд.

Стратегияи мубориза бо терроризм ва экстремизм кори на танҳо Ҳукумат ва сохторҳои он, балки тамоми ҷомеаи шаҳрвандии Тоҷикистон ба ҳисоб меравад. Яке аз роҳҳои мубориза бо терроризм, пеш аз ҳама, ин эҳёи фарҳанги асили миллӣ ва тарғиби ғояи сулҳу амният дар Тоҷикистон дониста мешавад. Бо мақсади қувват бахшидани ин масъала Ҳукумати мамлакат пайваста чора меандешад ва насли ҷавони кишварро ба ҳамкории зич даъват менамояд. Бо дарки ин омил, бевосита аз ҷониби Сарвари мамлакат эълон гардидани соли 2017 “Соли ҷавонон” худ гувоҳи таваҷҷуҳи хос ба ояндаву инкишофи ҳамаҷонибаи насли ҷавон мебошад.

Истифодаи дину мазҳабҳои мусулмонӣ ҳамчун идеология барои ба даст овардани ҳокимияти сиёсӣ, бо номи он рӯйпӯш намудани ҳаракатҳои ифротгароӣ, терроризм, даҳшатоварӣ моҳияти аслии ин динро суст намуда, қадру қимати онро паст мегардонад ва ба ислом иснод меорад.

Аз нигоҳи сиёсӣ мавҷудияти ҳизби мамнуъгаштаи наҳзати исломӣ, ки мақсади ниҳоии он таъсиси давлати исломӣ аст, баҳампайвандии арзишҳои милливу диниро, ки бе онҳо таъсиси давлати миллӣ-дунявӣ аз имкон берун аст, фалаҷ гардонида, якпорчагии халқу миллатҳои сокини кишварро, ки асосан мусулмонанд, халалдор мегардонад. Зиёда аз ин, чун ин ҳизбу ҳаракатҳо зидди бедории сиёсӣ, худогоҳӣ ва худшиносии миллӣ баромада, барои таҳкими демократия, амнияти соҳибистиқлолии давлат монеаҳо эҷод мекунанд.

Имрӯз ҷавонони мо қариб дар тамоми соҳаҳои ҷамъият бо шумораи беш фаъолият мебаранд, кору таҷриба меомӯзанд, ҳадафҳои созанда пешниҳод мекунанд, мехонанд, ҷӯё ҳастанд ва пайваста барои ободиву оромии Ватан саҳмгузорӣ мекунанд, ки ҳамаи ин боиси ифтихор аст. Ҷавонони саодатманди мо дар партави сиёсати хирадмандонаи Асосгузори сулҳу ваҳдати миллӣ – Пешвои миллат, Президенти мамлакат, муҳтарам Эмомалӣ Раҳмон ва Ҳукумати Ҷумҳурии Тоҷикистон муттаҳид гардида, бо ҳар гуна зуҳуроти номатлуби ҷомеа мубориза мебаранд.

Шарифхон ТИЛЛОЕВ, сиёсатшиноси ҳарбии собиқ ИҶШС