ҶОМЕА
Якшанбе 16 Январ 2022 04:07
8407

Ёддошти як ҳамхизмати Пешвои миллат

Дар беруни дарвоза бо ҷавонмарде вохӯрдам ва аз ӯ хонаи ҳоҷӣ Одинаро пурсидам. Ҷавонмард ба сӯйи дарвоза маро раҳнамоӣ карду ҳамроҳ дохили ҳавлӣ шудем. Пеши чашмонам ҳавлии тамиз ёфта, дарахтони қайчӣ зада, гармхонаи пур аз кабудӣ ва замини картошка шинонидашуда, ҷилвагар гардид.

- Ин ҳавлии мост. Падарам ҳо, ана бехи гулҳоро пойбел карда истодааст, - гуфт ҷавонмарди роҳбалад. Худро муаррифӣ намуд, ки Абдусалом писари ҳоҷи Одина мешавад.

Бо ҳоҷӣ салому алейк намудам. Ӯ белро ба замин гузошт ва сару рӯяшро таконда маро болои кат хонд. Чун мақсади моро фаҳмид, ки мехоҳем аз давраҳои хизмат дар сафи Қувваҳои Мусаллаҳи Иттиҳоди Шӯравӣ ва ҳамхизмати қадрдонашон муҳтарам Эмомалӣ Раҳмон қисса кунад, бисёр хушҳол.

Ӯ мактаби миёнаи рақами 30-и ноҳияи Ёвонро хатм намуда, ҳуҷҷатҳояшро ба факултаи агрономии совхоз – техникуми хоҷагии қишлоқи шаҳри Қурғонтеппа (ҳоло Бохтар) месупорад. Соли 1970 бо ихтисоси агроном техникумро хатм намуд. Дар даъвати тирамоҳии даъватшавандагон ба сафи Қувваҳои Мусаллаҳ соли 1971 ба Одина даъватнома омад ва бо дуои падару модар дар рӯзи муқарраршуда ба комиссариати ҳарбии ноҳия ҳозир гардид...

Аз нуқтаи ҷамъшавии наваскарон дар шаҳри Душанбе 150 нафар фарзандони тоҷикистонро баъди ҳафт рӯзи нигоҳ доштан, ба ҳавопаймо шинонида, роҳ сӯйи шаҳри Новосибирскии Русия гирифтанд. Баъди тақсимот Одина Ҳалимовро ҳамроҳи наваскарон ба кишвари Хабаровск, ноҳияи Краснофлот оварданд. Дар он ҷо ҳамроҳи Эмомалӣ Раҳмонов (аз ноҳияи Данғара), Пирумшо Хоҷаев (аз ноҳияи А. Ҷомӣ), Ҳабибулло Неъматов (аз шаҳри Ваҳдат) бо ҳам се сол дар флоти ҳарбӣ – баҳрии уқёнуси Ором хизмати Модар - Ватанро ба ҷо овардаанд.

Дар бронекатер дар як кубрик (ҳуҷраи киштӣ) ин чор нафар ҳамшаҳру ҳамхизмат бо ҳам дӯсту рафиқи ҷонӣ буданд. Савғое, ки аз хона падару модарон ба аскарони советӣ равон мекарданд, бо ҳам медиданд. Эмомалӣ Раҳмон аз рӯи ихтисос дар киштӣ электромеханик, Одина Ҳалимов моторист, Пирумшо Хоҷаев – ошпаз. Ҳабибулло Неъматов пулемётчӣ буд. Ҳамаи чор нафарон ва дигар аскароне, ки аз Тоҷикистон буданд, дар рӯзҳои истироҳатиашон дар хонаи ленинӣ ҷамъ омада, аз пешравию муваффақиятҳои хизматиашон ба ҳам нақл мекарданд. Мактубҳои аз Ватан омадаро мехонданд. Ва боз ба мактубҳо ҷавоб мегардониданд. Одина Ҳалимов дар хусуси ҷавонмардии ҳамяроқаш Эмомалӣ Раҳмон бо ифтихор сухан меронд. Ҳангоми аз ӯ тавсиф кардан чеҳрааш гул-гул мешукуфт.

- Ҷаноби олӣ як ҷавони дарёдил, одамдӯст ва муҳитар аз ҳама рафиқи ҷонӣ буд, - мегӯяд ӯ. – Ба онҳое, ки муҳтоҷи ёрӣ буданд, ёрӣ мерасонд, ҳам ёрии маънавӣ ва ҳам моддӣ. Ҳамчун котиби ташкилоти комсомолии қисми ҳарбӣ дар байни ҳамхизматон соҳиби обрӯ буд. Кӯмакаш ба ҳама мерасид ва ёриаш аз дили соф, бародарона, беғаразона аз аскар ба аскар буд.
Ҷанобӣ Олӣ шахси принсипиалӣ буданд, фармону супоришҳои додашударо пурра ва бе каму кост иҷро менамуданд. Ӯро барои овардани киштиҳои ҷангӣ ба шаҳри Керч (Украина) фиристоданд. Давоми чор моҳ дар он ҷо буд ва ҳамон киштиҳо ба уқёнуси Ором ба қисми ҳарбӣ оварда шуданд. Соли 1974 бо унвони старшинаи калон ба Ватан баргаштанд.

Ҳамин хислатҳо буд, ки соли 1974 ӯро ба узвияти ҳизби коммунистӣ қабул карданд. Тасаввур намоед, ки дар солҳои 70-ум ба сафи ҲКИШ (КПСС) қабул шудан, мушкилиҳо дошт, вале муҳтарам Эмомалӣ Раҳмон бо хизмати хубашон тавонистанд, ки аъзои ҳизби коммунистӣ шаванд.

Пас аз як соли хизмат ба Одина Ҳалимов мурахасии хизматӣ доданд ва ба дидори падару модар аз уқёнуси Ором ба ноҳияи Ёвон омад. Баъди чанд рӯз ба ноҳияи Данғара ба дидорбинии мубораки падару модари Ҷаноби олӣ шитофт. Як шаб меҳмони онҳо шуд. Ӯ ба падару модару хешу ақрабо дар хусуси хизмати садоқатмандонаи Эмомалӣ Раҳмон ҳарф зад.

Дар навбати худ ҳангоми мураххасии хизматӣ Эмомалӣ Раҳмон низ аз ҳоли падару модари Одина Ҳалимов хабар гирифт. Ин нишонаи он буд, ки ин ду ҳамхизмат дӯстони азиз шуданд. Ҳоло ҳам ин дӯстии онҳо давом дорад ва ҳар вақте ки Пешвои миллат бо сафари корӣ ба ноҳияи Ёвон меояд, рафиқи ҳамяроқаш Одина Ҳалимовро суроғ мекунад. Ҳолу аҳволи якдигарро мепурсанд ва аз фаъолияти кориашон хабардор мегарданд.

Зайнулобиддин ҲУСЕЙНОВ,
собиқадори матбуот

Эзоҳи худро нависед



Рамзҳо дар расм

Рӯзнома

Назарсанҷӣ

У вас нет прав на участие в данном опросе.

Тақвим

Дш Сш Чш Пш Ҷ Ш Яш
27 28 29 30 31 1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31 1 2 3 4 5 6

Январ 2022 c.