Пас аз пайдо шудани коронавирус дар Тоҷикистон баробари дигар шаҳрҳои ҷаҳон дар кӯчаву хиёбонҳои шаҳри Душанбе одамон аҳён-аҳён ба назар мерасанд. Вале ба ин нигоҳ накарда, гаштугузори ҷӯгиҳо то ҳол кам нашудааст. Ин гаштугузори бепарвоёнаи ҷӯгиҳо, ки аққалан ниқоби муҳофизатӣ ҳам надоранд сокинони шаҳрро нигарон кардааст.

Аз ҷумла, яке аз корбарони Фейсбук бо нигаронӣ навиштааст, ки садди роҳи ҷӯгиҳо гирифта шавад. Чун бепарвоёна ва бе риояи гигиенаи шахсӣ ҳам дар кӯчаҳои шаҳр ва ҳам хона ба хона гаштугузор кардани онҳоро хатарнок хондааст. Ин корбари фейсбук ба ҳукумати шаҳр пешниҳод намудааст, ки садди роҳи онҳо гирифта шавад ва аксари корбарон низ ӯро ҷонибдорӣ намудаанд.

Шамсия Бадалова, корбари дигар навиштааст: “Ҳамарӯза, махсусан рӯзҳои ҷумъа дар маҳаллаи 82-юм 5-6 ҷавонзани ҷӯгӣ дар дасташон кӯдакони ширмак ва бо кӯдакони 4-6 сола дар ба дар мегарданд. Ба онҳо гуфтам, ки шумо набояд гардед, мумкин нест, кӯдакҳоятон ва худатон касал мешавед. Хандиданду гуфтанд, ки ҳеҷ корамон намешавад”.

Бо чунин ҳолат банда низ чанд рӯз пеш гирифтор шудам, ки воқеан ҳам нигаронкунанда аст. Субҳгоҳон аз хона ба кор мерафтам, ки ҷӯгие дар даст кӯдаки ширмакаш дари ҳамсояро мекуфт. Ҳамсояи поёнамон дарашро кушода, дарҳол ба ғазаб омада, ҷӯгиро ронд ва бо овози баланд “рав аз ин ҷо, айни замон тамоми ҷаҳонро пандемия фаро гирифтааст ва ҳузур доштани шумо дар ин ҷо, махсусан гаштани хона ба хона хатарнок аст. Рафта дар хонаҳоятон шинед” гуфт. Вале ҷӯгӣ гапи зани ҳамсояро ба инобат нагирифта, мехост ба ошёнаи боло барояд. Зан қотеъона садди роҳи ҷӯгизан шуд ва ӯро нагузошт, ки ба ошёнаи боло барояд. Ҷӯгӣ зери лаб он занро чӣ дашномҳое, ки медонист, медод...

Ин ҷои баҳс надорад, ки дар ҳама давру замон талбандагӣ барои ҷӯгиҳо чун шуғли ҳамешагӣ ва онҳо аз баҳри он намегузаранд. Вале дар ин замоне, ки тамоми ҷаҳон бар зидди бемории COVID-19 мубориза мебарад ва он талафоти зиёди ҷониро дар пай дорад, ҳадди ақал ниқоб пӯшидан ва худрову атрофиёнро ҳифз кардан, чандон масъулияти зиёдро талаб намекунад.

Аз ҳолати баамаломада комилан ҳақ бар ҷониби ҳамсоязани мост. Чун воқеан ҳам, дар ин даврони ҳассос моро мебояд эҳтиёткор ва паҳлуи ҳам бошем. Дар ин ҳолат пеш аз ҳама гигиенаи шахсиро риоя кунем, то ин ки саломатӣ ва ҳифзи ҷигарбандони худро дар амон нигаҳ дорем. Ва боз ҳам боиси зиёд паҳн кардану талафоти зиёди мардуми хеш нагардем.