Тибқи нақшаи чорабиниҳои мақомоти иҷроияи маҳаллии ҳокимияти давлатии шаҳри Қӯрғонтеппа моҳи августи соли ҷорӣ дар маҳаллаҳои “Бобоҷон Ғафуров”, “Баҳор”, “Ғайрат”, ва “Гулистон” бо занон ва духтарони хонашин вохӯрӣ гузаронида шуд.

Рӯзи 7 августи соли 2017 дар толори МТМУ №4-и шаҳр оид ба пешгирӣ намудани бекоршавии ақди никоҳ, барҳам додани никоҳи хешутаборӣ, пешгирии ҳар гуна омилҳои номатлуб байни ҷомеа вохӯрӣ доир гардид.

Дар вохӯрӣ мудири Бахши кор бо занон ва оилаи МИҲД-и шаҳр Силсиламоҳ Тоирова иброз дошт, ки “Имрӯз аз сабаби барвақт оиладор кардани ҷавонон ақди никоҳи бархе аз оилаҳои ҷавон бекор карда мешавад, ки боиси нигаронист. Мо огоҳ ҳастем, ки никоҳи хешутаборӣ оқибати хуб надорад. Барои бартараф кардани камбудии ҷомеа мо якҷоя бояд кӯшиш намоем, пеши роҳи бекоршавии ақди никоҳ ва зӯроварӣ дар оиларо гирем”.

Дар мулоқот занони хонашин оид ба муаммоҳои ҷойдошта бо суолу дархостҳои хеш муроҷиат намуда, аз тарафи гурӯҳи доимамалкунандаи назди Бахши кор бо занон ва оилаи шаҳр посух ва маслиҳатҳои муфид гирифтанд.

Баргузории чунин вохӯрию мулоқотҳо ва корҳои фаҳмондадиҳӣ тибқи нақша дар дигар маҳаллаҳои шаҳр ба роҳ монда мешавад.

Умед МИРЗОЕВ, “ҶТ”