Дар Ҷумҳурии Тоҷикистон соли 2022 зиёда аз 13 ҳазор бекоршавии ақди никоҳ ба қайд гирифта шудааст, ки нисбати соли 2021-ум 161 адад зиёд аст.

Дар ин бора 10-уми феврал Ҳилолбӣ Қурбонзода, раиси Кумитаи кор бо занон ва оилаи назди Ҳукумати Ҷумҳурии Тоҷикистон зимни нишасти хабарӣ иттилоъ дод.

Раиси Кумита ҷудошавии оилаҳоро нигаронкунанда хонда, гуфт, ки гирифтани душаҳрвандӣ аз ҷониби шаҳрвандони кишвар таъсири худро ба ин омор расонидааст. Чун бештари онҳо ақди никоҳи қалбакиро ба роҳ мондаанд.

- Пеш аз ҳама, ин гуна ҳолатҳо бештар дар вилояти Хатлон, ноҳияи Рашти НТҶ ва дар ноҳияи Ванҷи ВМКБ ба назар мерасад. Масалан, дар вилояти Хатлон 805 нафар (25%), ноҳияи Рашт 27 адад (22%) ва ноҳияи Ванҷ 31 адад (40%) никоҳҳое ҳастанд, ки ғайрирасмӣ ба роҳ монда шудааст, - гуфт номбурда.