ҶОМЕА
Якшанбе 26 Май 2024 07:32
7796
Соли 2020 дар ҳудуди Ҷумҳурии Тоҷикистон 213 ҳолатҳои фавқулода ба амал омадааст, ки аз ин 25 ҳодиса офатҳои табиӣ будаанд. Дар натиҷаи ин офатҳо ба аҳолӣ ва иқтисодиёти мамлакат зарари моддӣ расида, 8 нафар шаҳрванди кишвар ба ҳалокат расидаанд. Ин нукта зимни суханронии Рустам Назарзода, раиси Кумитаи ҳолатҳои фавқулодда ва мудофиаи граждании мамлакат дар нишасти матбуотии ин ниҳод зикр гардид.

Гуфта шуд, ки дар ин давра бар асари риоя накардани қоидаҳои бехатарӣ ҳангоми оббозӣ 107 нафар ҷони худро бохт, ки 6 нафар кӯдакони то 4-сола буданд. Омилҳои ба ин гуна ҳолатҳо дучор омадани шаҳрвандонро масъулини Кумита беэҳтиётӣ, қасди худкушӣ, риоя накардан ва надонистани қоидаҳои оббозӣ, беназоратии волидон ва амсоли инҳо арзёбӣ менамоянд.

Дар натиҷаи роҳандозии корҳои садамавию наҷотдиҳӣ кормандони Кумита ба 781 даъвати фаврӣ посух дода, ҷони 216 нафарро аз хатар наҷот додаанд.

- Айни замон дар ҳудуди кишвар 1471 минтақаи хавфнок вуҷуд дорад, ки 308-тои он ба ВМКБ, 293 адад ба вилояти Суғд, 401 адад ба вилояти Хатлон, 223 адад ба минтақаи Рашт, 236 адад ба минтақаи Ҳисор ва 10 адад ба шаҳри Душанбе рост меояд, - гуфт дар идома Р. Назарзода.

Ба таъкиди масъулин айни ҳол Кумитаи ҳолатҳои фавқулодда ҷиҳати коҳиш додани хатари офатҳои табиӣ як қатор санадҳои меъёриро таҳия ва тасдиқ намудааст. Инчунин сохтмони Маркази миллии омодасозии наҷотдиҳандагон ва Маркази миллии ҳолатҳои буҳронии Кумита ба нақша гирифта шудааст. Илова ба ин, бо мақсади такмил додани системаи мониторинг ва огоҳии барвақтӣ дар кӯли Сарез корҳо оғоз гардида, дар давоми соли ҷорӣ системаи нави огоҳонидани фаврӣ ва мониторинги кӯли Сарез ба истифода дода мешавад.



Эзоҳи худро нависед



Рамзҳо дар расм