Новобаста аз чораҳои андешидашудаи пешгирикунӣ зиёда аз 250 нафар зани тоҷик ба сафи ташкилоти террористии “Давлати исломӣ” пайваста, дар фаъолияти экстремистию террористии он ва амалиётҳои ҷангӣ дар хориҷи кишвар иштирок намудаанд.

Дар ин бора Назарзода Ҳотам, муовини якуми Прокурори генералии Ҷумҳурии Тоҷикистон санаи 9 октябр зимни Форуми ҷумҳуриявӣ дар мавзӯи “Баланд бардоштани маърифати сиёсиву ҳуқуқии занону ҷавондухтарон - омили рушди суботи ҷомеа” иттилоъ дод.

Ба таъкиди номбурда дар натиҷаи корҳои фаҳмондадиҳии мақомоти ҳифзи ҳуқуқ ва намояндагони дипломатӣ шумораи зиёди онҳо ба ватан баргардонида шуданд. Нисбати дигар занҳо, ки ба фаъолияти экстремистӣ ва террористӣ рӯй оварда буданд, парвандаҳои ҷиноятӣ оғоз гардида, бархе аз онҳо ба ҷавобгарии ҷиноӣ кашида шудаанд. Қисмати дигар бошад, дар рафти иштирок дар амалиётҳо кушта шудаанд, ё то имрӯз дар кофтуков қарор доранд.

Дар идома бо таассуф зикр гардид, ки даҳҳо нафар фарзандони ин занҳои гумроҳшуда, ки дар задухурдҳои мусаллаҳона талаф гардида буданд, ятим ва бесаробон монда, падару модар ва дигар наздиконашон мубталои ғаму андӯҳ шуданд.

Гуфта шуд, ки баҳри пешгирии ин зуҳуроти номатлуб Стратегияи миллии Ҷумҳурии Тоҷикистон оид ба муқовимат ба терроризм ва экстремизм барои солҳои 2016-2020 қабул гардида, ҷиҳати таъмини иҷрои он нақшаи амалҳо қабул карда шуда, он мавриди иҷро қарор дорад. Аз ҷумла мақомоти прокуратура дар якҷоягӣ бо Кумитаи кор бо ҷавонон ва варзиш ва Кумитаи кор бо занон ва оила ҷиҳати амалишавии бандҳои дахлдори нақшаи амалҳо дар минтақаҳои осебпазир бо занону духтарон суҳбату вохӯриҳо доир намуданд.