Сар аз 22-юми октябр 3-юм Бозиҳои осиёии наврасон дар Баҳрайн баргузор мешавад ва қарор аст рақобати наврасон то 31-уми октябр идома меёбад. Ба барномаи Бозиҳо 26 намуди варзиш шомил аст ва аз рӯйи онҳо 256 мусобиқа баргузор мешавад.

Аммо дар асоси барномаи Бозиҳо аллакай, баъзе мусобиқаҳо ба мисли ҳендбол, пенсак-силат, каббода ва кураш – 19-уми октябр оғоз гардиданд.

Бояд гуфт, ки дар 3-юм Бозиҳои осиёии наврасон Тоҷикистонро 65 варзишгар аз рӯйи 12 намуди варзиш: варзиши сабук, шиноварӣ, бокс, бадминтон, ҷудо, гӯштини тарзи озод ва юнонӣ-римӣ, кураш, варзиши электронӣ, ҷиу-ҷитсу, муай, таеквондо ва ММА намояндагӣ мекунанд.

Аз варзишҳои қаблан оғозгардида варзишгарони тоҷик дар намуди кураш аввалин медал ба даст оварданд, ки ба Абубакр Тураев дар вазни 65 кг тааллуқ дорад. Тураев дар ин вазн бо баромади шоиста сазовори медали биринҷӣ гашт.

Гуфтан зарур аст, ки дар 2-юм Бозиҳои осиёии наврасон, ки соли 2013 дар Нанҷинги Чин доир гашта буд, варзишгарони мо 2 медал – як нуқра, як биринҷӣ – ба даст оварда буданд.