Имрӯз кишварҳои зиёди ҷаҳону сарварони онҳо эътироф менамоянд, ки таҷрибаи 30 соли давлатдории тоҷикон ибратомӯз буда, суботу пешравиро ба бор оварда истодааст. Иродаи матини халқи тоҷик таҳти роҳбарии Пешвои муаззами миллат муҳтарам Эмомалӣ Раҳмон буду ҳаст, ки парешонгаштагон ҷамъ омада, давоми 30 сол давлат рушду такомул ёфт ва дастоварде ба дастовардҳои дигар зам гардид.

Маҳз самараи талошҳои бемислу монанди Сарвари давлати тоҷикон дар ҳамаи самтҳо аст, ки чанде пеш дар вохӯрии машваратии сарони давлатҳои Осиёи Марказӣ президенти Туркманистон Гурбонгулӣ Бердимуҳаммадов бо Қарори муштараки сарони давлатҳои Осиёи Марказӣ барои хизматҳои шоиста дар рушди муносибатҳои дӯстӣ, ҳамсоягии нек, ҳамдигарфаҳмӣ ва ҳамкории давлатҳои Осиёи Марказӣ, таҳкими сулҳу амният дар минтақа, пешбурди манфиатҳо ва ташаббусҳои муштараки кишварҳои минтақа дар арсаи байналмилалӣ нахустин мукофоти олӣ – “Нишони фахрии сарони давлатҳои Осиёи Марказӣ”-ро дар вазъияти тантанавӣ ба Пешвои муаззами миллат муҳтарам Эмомалӣ Раҳмон тақдим намуд.

Феълан дар асоси дастгириҳои бевоситаи Президенти кишвар муҳтарам Эмомалӣ Раҳмон ва раиси шаҳри Душанбе Рустами Эмомалӣ дар худи маҳаллаҳои шаҳри Хоруғ бунёду азнавсозии беш аз 93 иншооти таъиноти гуногун, аз қабили Маркази ҷавонони ВМКБ, биноҳои баландошёнаи истиқоматӣ, биноҳои мақомоти иҷроияи ҳокимияти давлатии шаҳру Донишгоҳи давлатии Хоруғ, майдонҳои варзишӣ, майдончаҳои бозии кӯдакона ва равшаникунонии маҳаллаҳо бо суръат идома дорад.

Ногуфта намонад, ки маҳз 30 соли истиқлол шароиту имкониятҳои зиёдеро фароҳам овард, ки дар маркази вилоят зиёда аз 20 адад майдони варзишии ҷавобгӯи талаботи замон сохта шаваду таваҷҷуҳ ба тарзи ҳаёти солим аз аввала бештар тақвият ёбад.

Дар ин маврид Баноз Карамхудоева, сокини шаҳри Хоруғ гуфт, ки дастовардҳои 30 соли Истиқлол албатта зиёданд ва мо бояд аз ҳар яки он шукргузор бошем.

- Чашми бино ба арқому шарҳи зиёд ниёз надорад ва ҳамаи корҳои созандагию бунёдкорӣ дар маркази вилоят худ далели гуфтаҳои болост. Имрӯз мо бояд дар замири наслҳои ояндасоз муҳаббати чунин ободиҳою шоҳкориҳоро парварем, то онҳо низ муҳофизи дастовардҳои замони соҳибистиқлолӣ бошанду онро чун гавҳараки чашм ҳифз намоянд,- илова намуд, Б. Карамхудоева.

Ҳоло таъмиру тармими роҳҳои аҳамияти ҷумҳуриявию маҳаллӣ ва байнишаҳрӣ низ дар ҳудуди Хоруғ бомаром ҷараён дошта, феълан даҳҳо техникаи корӣ ва кормандони соҳаи роҳсозии ВМКБ ба онҳо ҷалб шудаанд.
Тибқи Барномаи беҳтарсозии обу ташноб ва партови сахти маишии шаҳри Хоруғ, ки бо маблағи 8 миллион евраю 4 миллион маблағи грантӣ ва 4 миллион маблағҳои қарзи имтиёзнок (муодили 106,6 миллион сомонӣ) амалӣ мегардад, 14 километри хати дар маркази вилоят азнавсозиву иваз карда мешавад. Илова бар ин, дар доираи Барномаи устуворгардонии шаҳри Хоруғ бошад, бунёди ҳафт чоҳи амудӣ дар назар дошта шудааст.
Ба гуфти раиси шаҳри Хоруғ Мирзонабот Алишери Худобердӣ агар солҳои пеш сокинони маҳаллаҳои Тем, Фурудгоҳ, Дашти Боло ва дигар кӯчаҳои маркази вилоят аз оби нӯшокию полезӣ сахт танқисӣ мекашиданд, ҳоло маҳз бо шарофати соҳибистиқлолӣ маҳаллаҳои мазкур ба об дастрасӣ пайдо намуданд.

Бар замми ин, тирамоҳи соли равон таъмиру азнавсозии қисматҳои нисбатан хавфпазири ҷӯйборҳои Додихудо ва Темури шаҳр дар назар мебошад. Яъне баъди дастрасии пурра пайдо кардани аҳолии маркази вилоят ба оби полезӣ, мушкилии оби ошомиданӣ комилан ҳалли худро меёбад.

Дар самти равшаникунонии шаҳр танҳо давоми шаш моҳи соли равон дар маҳаллаҳои Андарситез, Боғи ботаникӣ, Бархоруғ, Фурудгоҳ, Селхозтехника ва ғайра иловатан дар масофаи 8 километр фурӯзонакҳои наву замонавӣ насб гардида, равшаннокии шаҳр минбаъд беҳтар мешавад.

Дар мавриди кабудизоркунӣ бошад, имсол зиёда аз 3000 дарахтони ҳамешасабзу мевадор ва гулҳои гуногуни ороишӣ шинонда шуда, инчунин зиёда аз 10 гармхонаи наву замонавӣ дар ҳудуди шаҳр сохта шудааст.
Тавре сокини ҷамоати шаҳраки Исмоили Сомонии шаҳри Хоруғ Зафар Балхов иброз намуд, хама гуна корҳои созандагӣ ба рӯҳу равони сокинон, меҳмонон ва дигар табақаҳои аҳолӣ асари воқеӣ гузошта, боиси ифтихор аст, ки халқро саргарми кору фаъолият мебинем.

- Ҳоло садҳо нафар соҳибкорони ватанӣ дар пешравии соҳаҳои ҳаётан муҳими кишвар азму талош ба харҷ дода, аз имкониятҳои мавҷудаи соҳибистиқлолӣ баҳра мебаранд. Бинобар ин, рушди соҳибкорӣ ҳам дар баробари дигар соҳаҳои афзалиятноки давлат дар меҳвари таваҷҷуҳи Пешвои миллат ва Ҳукумати Ҷумҳурии Тоҷикистон қарор дорад, - қайд кард, З. Балхов.

Ғайр аз иншооти болозикр дар маркази вилоят даҳҳо мактабҳои наву замонавӣ, аз ҷумла Мактаби президентии Хоруғ, мактаб – литсейи Оғохон, инчунин Донишгоҳи Осиёи Марказӣ, марказҳои рушди барвақти кӯдакон, хобгоҳҳои замонавӣ барои донишҷӯёни Донишгоҳи давлатии Хоруғ, театри вилоятии ба номи Меҳрубон Назаров, Чорбоғи шаҳр, биноҳои истиқоматии баландошёна, Варзишгоҳи марказӣ, маҷмааи варзишӣ, Маркази омодагии олимпӣ, Бозори 20 – солагии Истиқлолият, марказҳои савдову мағозаҳои замонавӣ, Муассисаи давлатии “Телевизиони Бадахшон”, беморхонаву муассисаҳои тиббӣ, Маркази ташхиси тиббии Оғохон ва дигар иншооти зарурӣ мавриди баҳрабардорӣ қарор гирифтанд.

Вале ба гуфтаи муаррих Розик Худобердиев дастоварди аслӣ ин таҳкими сулҳу субот, давлатдорӣ ва ягонагии халқу миллат мебошад, ки имрӯз чандин кишварҳои олам аз он бенасибанд.

- Вақте ки появу рукнҳои асосии давлатдорӣ устуворанд, пас, иродаи халқ ҳам шикастнопазир аст. Ба туфайли Пешвои муаззами миллат халқи тоҷик дубора иттиҳоду ягонагиро соҳиб шуда, давлати маҳбубу мутамаркази Тоҷикистон бунёд гардид. Ҳоло танҳо ҳадафҳои созандаи дарпешгузоштаи Роҳбари давлат ва Ҳукумати кишварро бо тамоми саъю талошҳо бояд дунбол кард, то рушду пешрафти Ватан, ояндаи шоистаи наслҳои имрӯзу фардо дар сатҳи баланд таъмин гардад, - афзуд, муаррих.

Барои рӯи коғаз овардани ҳамаи дастовардҳои 30 соли Истиқлол иншои чандин китоб камӣ мекунанд. Аммо ҳамин нуктаро бояд ёдрас шавем, ки ҳаёти осоиштаю рӯзгори некамон аз истиқлол сарчашма мегирад. Пас, моро месазад, муҳофизи ин неъмати бебаҳо бошему таҳкимбахши он.