Имрӯз зери ин унвон бо ташаббуси филиали Иттифоқи ҷавонони Тоҷикистон дар шаҳри Душанбе ва Раёсати кор бо ҷавонон ва варзиши шаҳри Душанбе дар бинои Донишгоҳи давлатии тиҷорати Тоҷикистон конференсияи илмӣ-амалӣ бахшида ба таҷлили 30-юмин солгарди таъсисёбии Иттифоқи Ҷавонони Тоҷикистон баргузор гардид.

Дар конференсия Абдулло Раҳмонзода, раиси Иттифоқи ҷавонони Тоҷикистон (ИҶТ) ва дигар масъулини соҳа иштироку суханронӣ намуданд.

Абдулло Раҳмонзода зимни ифтитоҳи чорабинӣ иброз дошт, ки “Баъд аз як моҳи ба даст овардани Истиқлолияти давлатӣ аввалин ташкилоти ҷамъиятӣ -Иттифоқи ҷавонони Тоҷикистон таъсис ёфт. Тӯли 30 соли фаъолият ИҶТ дар самти татбиқи сиёсати ҷавонон ба дастовардҳои назаррас ноил гардид. Боиси таҳсину офарин аст, ки имрӯз ҷавонони фаъоли кишвар барои расидан ба ҳадафҳои ҳаётан муҳим зери сиёсати ҷавонпарваронаи Асосгузори сулҳу ваҳдати миллӣ - Пешвои миллат муҳтарам Эмомалӣ Раҳмон амал намуда истодаанд”.

“Дар зарфи 30 соли соҳибистиқлолӣ беш аз 78 санад дар самти татбиқи сиёсати давлатии ҷавонон мавриди амал қарор гирифтанд, ки ин аз дастгириҳои ҳамешагии Ҳукумати кишвар ва ҳамчун сиёсати иҷтимоӣ пазируфтани сиёсати давлатии ҷавонон ба ҳисоб меравад. Ин барномаҳо фарогири самтҳои муҳими соҳаи афзалиятноки сиёсати давлатии ҷавонон буда, барои рушду тавсеаи ҷавонон заминаи мусоид фароҳам меорад”, - иброз дошт, Шоҳзод Раҳимзода, раиси филиали Иттифоқи ҷавонони Тоҷикистон дар шаҳри Душанбе.

Дар интиҳои конференсия ба як қатор собиқадорони соҳа, иштирокдорон ва аъзоёни фаъоли ИҶТ сипосномаҳои иттифоқ тақдим гардид.