Соли 2022-юм 383 шаҳрванди кишвар барои кор ба Британияи Кабир фиристода шудаанд. Дар ин бора Гулнора Ҳасанзода, визири меҳнат, муҳоҷират ва шуғли аҳолии Ҷумҳурии Тоҷикистон 13 феврал зимни нишасти хабарӣ иттилоъ дод.

Ӯ гуфт, дар натиҷаи озмуне, ки гузаронида шуд, 383 нафар ба Британияи Кабир барои кор фиристода шуданд.

“Дар натиҷаи ду озмуне, ки моҳи март ва майи соли гузашта бо иштироки намояндагони ширкати “Про-форс” баргузор карда шуд, муҳоҷирони меҳнатӣ дар Британияи Кабир бо кор таъмин гардиданд”, - гуфт Ҳасанзода.

Ҳамзамон ӯ гуфт, ки муҳоҷирони меҳнатӣ пас аз як муддати муайяни корӣ, танҳо пас аз гузашти шаш моҳ метавонанд, дубора ба кор ба Британия раванд.
Зикр гардид, ки гурӯҳи дигари муҳоҷирони тоҷик моҳи январи соли равон аз суҳбат гузаштаанд ва бояд моҳҳои март ё апрели соли равон барои шаш моҳ ба Британия фиристода шаванд.

Бояд гуфт, ки шаҳрвандони Тоҷикистон дар Британия асосан ба корҳои мавсимӣ дар саҳроҳо ва гармхонаҳо машғул шуда, ҳосили буттамевагиҳо, ба монанди клубника ва дигар сабзавоту меваҳоро ҷамъоварӣ мекунанд.