Ба иттилои муовини аввали директори Агентии суғуртаи иҷтимоӣ ва нафақаи назди Ҳукумати ҷумҳурӣ Назокат Одинаева дар шаҳру ноҳияҳои кишвар дар асоси Қонуни Ҷумҳурии Тоҷикистон “Дар бораи нафақаҳои суғуртавӣ ва давлатӣ” ба 29819 нафар нафақа таъин карда шудааст, ки аз ин 20452 нафар нафақаи суғуртавӣ ва 9367 нафар нафақаи иҷтимоӣ мебошанд.

Дар маҷмӯъ теъдоди умумии нафақагирон дар ҷумҳурӣ ба ҳолати 1 июли соли ҷорӣ 679087 нафар мебошад, ки ин нисбати 1 январи соли 2018 14009 нафар ё 2,1 фоиз ва нисбати ҳамин давраи соли гузашта, 23272 нафар ё 3,5 фоиз афзоиш ёфтааст.

Зимни нишаст ҳамчунин таъкид гардид, ки Агентӣ дар асоси дастуру супориши Пешвои миллат ҷиҳати таъмини саривақтии нафақаву кӯмакпулиҳои иҷтимоии шаҳрвандон, аз ҷумла аз 1 сентябри соли равон зиёд намудани андозаи нафақа, инчунин беҳтар намудани сатҳи хизматрасонӣ ба нафақагирон тадбирҳои мушаххас роҳандозӣ менамояд.