Ширин Амонзода, вазири меҳнат, муҳоҷират ва шуғли аҳолии Ҷумҳурии Тоҷикистон гуфт, ки соли гузашта дар кишвар 70,6 ҳазор нафар ба кор таъмин гардидаанд.

Ӯ ин нуктаро рӯзи 9-уми феврал зимни нишасти хабарӣ гуфт. Вазир ҳамзамон аз сатҳи бекорӣ дар минтақаҳои кишвар ибрози андеша намуд.

Ӯ гуфт дар кишвар расман 106,2 ҳазор нафар ҳамчун корҷӯ сабт шудаанд. Ба гуфтаи Амонзода сатҳи нисбатан баланди бекорӣ дар ВМКБ ба қайд гирифта шудааст, ки он ба 6% баробар аст. Ин нишондод дар навоҳии тобеи ҷумҳурӣ - 2,9%, вилояти Хатлон - 2% ва дар вилояти Суғд - 1,9%-ро ташкил медиҳад.

Аз 141,8 ҳазор корҷӯе, ки ба Вазорати меҳнат, муҳоҷират ва шуғли аҳолии Тоҷикистон муроҷиат кардааст, дар соли 2021расман 58,9 ҳазор нафар мақоми бекорро гирифтанд.
Дар мавриди кумакпулӣ дар давраи бекорӣ зикр гардид, ки соли 2021 ба 13 ҳазор нафар ҳудуди 7,5 миллион сомонӣ ҷудо гардид.

Ба иттилои вазир, соли гузашта дар ниҳоди таҳти идорааш ба беш аз 205,7 ҳазор нафар дар масоили гуногун хизматрасонӣ шудааст. Аз ҷумла 70,6 ҳазор нафар бо кор таъмин гардидаанд.
Дар ин миён 7 ҳазор нафар аз ҳисоби квотаҳо, 3,3 ҳазор нафар тариқи гирифтани қарзҳои хурд ба маблағи 10,3 миллион сомонӣ, 8,2 ҳазор нафар дар ярмаркаҳои ҷойҳои холии корӣ ва 42,3 ҳазор нафари дигар бо роҳҳои дигар соҳиби ҷои кор шуданд.