Аз тарафи кормандони ҳифзи давлатии ҷангал доир ба вайрон кардани талаботи қонунгузории соҳаи хоҷагии ҷангал ва шикор нисбат ба ҳуқуқвайронкунандагон ба миқдори 1632 адад санад тартиб дода шуда, ба маблағи 742,1 ҳазор сомонӣ зарар муайян карда шуда, аз ин 708,2 ҳазор сомонӣ барқарор карда шудааст.

Дар ин бора Абдуҷаббор Юсуфзода, директори Агентии хоҷагии ҷангали назди Ҳукумати Ҷумҳурии Тоҷикистон 1-уми феврал зимни нишасти матбуотӣ маълумот дод.

Аз миқдори умумии қонунвайронкуниҳои ошкоргардида 876 адад ба маблағи 450,0 ҳазор сомонӣ ба буриши ғайриқонунӣ, 416 адад ба маблағи 173,5 ҳазор сомонӣ ба чорвочаронии худсарона, 173 адад ба маблағи 40,3 ҳазор ба ҷамъоварии худсаронаи гиёҳҳои хӯрданибобу шифобахш, 51 адад ба маблағи 16,1 ҳазор сомонӣ ба шикори беиҷозат, 116 адад ба маблағи 62,2 ҳазор сомонӣ ба дигар намуди қонунвайронкуниҳои ҷангал рост омадааст.

Номбурда ҳамчунин қайд кард, ки дар ин давра ба миқдори 1034 адад протоколҳои ҳуқуқвайронкунии маъмурӣ ба маблағи 273,4 ҳазор сомонӣ тартиб дода шуда, аз он маблағи 241,7 ҳазор сомонӣ ситонида шудааст.

Ҳошим РАҲМАТУЛЛОЕВ, "ҶТ"