Соли 2023 маҷмуи маҳсулоти минтақавӣ ба 26,7 млрд. сомонӣ баробар гардида, суръати афзоиши воқеии он нисбат ба ҳамин давраи соли пешин 108,3 фоиз ва саҳми он дар ММД 20,2 фоизро ташкил дод, ки асосан аз ҳисоби зиёд гардидани ҳаҷми истеҳсоли маҳсулоти саноатӣ ба андозаи 112 фоиз, хизматрасонии пулакӣ 120 фоиз, боркашонӣ 116 фоиз ва мусофиркашонӣ 105 фоиз таъмин гардидааст.

Дар ин бора Табарзода Ҷамшед Афзал, муовини аввали раиси шаҳри Душанбе зимни нишасти хабарии Мақомоти иҷроияи ҳокимияти давлатии шаҳри Душанбе иттилоъ дод.

Гуфта шуд, ки соли 2023 аз ҷониби 751 корхонаи саноатӣ новобаста аз шакли моликият ҳаҷми истеҳсоли маҳсулоти саноатӣ ба 42 миллиард сомонӣ баробар гардид, ки нисбат ба ҳамин давраи соли 2022-юм 729 миллион сомонӣ зиёд буда, суръати афзоиш 121 фоизро ташкил медиҳад.

- Айни ҳол дар шаҳри Душанбе сохтмон ва бунёди 71 адад коргоҳу корхонаҳои саноатӣ бо таъсиси беш аз 5 ҳазор ҷойи нави корӣ пешбинӣ гардидааст, - гуфт муовини аввали раиси шаҳри Душанбе.

Ҳамзамон таъкид гардид, ки соли 2023 дар шаҳри Душанбе 181 адад корхонаю коргоҳҳои истеҳсолӣ бо таъсиси 7447 адад ҷойҳои нави корӣ фаъолиятро оғоз намуданд.