3493 нафар шаҳрванди ҷумҳурӣ дар муассисаҳои таълими динии хориҷ аз кишвар таҳсил менамуданд. Дар натиҷаи андешидани чораҳои зарурӣ то имрӯз 3210 нафари онҳо ба Ватан баргардонида шуда, мутаассифона, аз ин теъдод 92 нафарашон дубора бо роҳҳои гуногун ба ҷойи таҳсили пешинаашон баргаштаанд.

Ҷумъахон Ғиёсов, муовини якуми раиси Кумитаи оид ба корҳои дин, танзими анъана ва ҷашну маросимҳои миллии назди Ҳукумати ҷумҳурӣ зимни нишасти хабарӣ иброз дошт, ки кумита дар давраи ҳисоботӣ дар асоси 116 дархост 397 номгӯи адабиёт, 2 дафтар, 1484 варақаи дорои мазмуну муҳтавои динӣ, 2 саҳифаи солшумории мелодӣ-ҳиҷрӣ барои соли 2016 ва 4 расми дорои парчами сиёҳро мавриди таҳлил ва ташхис қарор дода, ба 244 номгӯи адабиёт, 2 дафтар, 2 саҳифаи солшумории мелодӣ-ҳиҷрӣ барои соли 2016 ва 294 варақ хулосаи мусбат ва ба 153 номгӯи адабиёт, 1190 варақаи дорои мазмуни динӣ хулосаи манфӣ дод.

Соли сипаришуда 10 рейди муштарак дар якҷоягӣ бо намояндагони Кумитаи давлатии амнияти миллӣ гузаронида шуд, ки дар натиҷа 41 мағоза ва дӯконҳои фурӯши адабиёти динӣ ва дигар маводи таъиноти динидошта мавриди санҷиш қарор гирифта, 388 китоб ва 2157 фитаи дорои мазмуну муҳтавои динӣ мусодира шуд. Дар робита ба ин се протоколи ҳуқуқвайронкунии маъмурӣ тартиб дода шудааст.